هەپەگە ئامادەیی خۆی بۆ بەشداریكردن لە شەڕی دژ بە داعش ڕادەگەیەنێت و دەشڵێت، ئەو هاوكارییانەی لەلایەن هاوپەیمانانەوە بۆ پێشمەرگە نێردراون لە بەرامبەر گەریلا جێگیركراون، لەبری ئەوەی ئەو هێزانە ڕوو لە دوژمن جێگیربكرێن.
سەردار یەكتاش، وتەبێژی ڕاگەیاندنی هێزەكانی پاراستنی گەل – هەپەگە سەبارەت بە هێرشەكانی ئەمدواییەی داعش ڕایگەیاند، “لە دەروروبەری كەركوك جموجوڵی داعش هەیە و گۆڕدراوە بۆ هێرشكردن، خەڵكی مەدەنی و پێشمەرگە شەهید دەبێت، بەو بۆنەیەوە سەرەخۆشی لە خانەوادەی شەهیدان و گەلی باشوور دەكەین”.
ئاژانسی فورات نیوز لە زاری یەكتاش لەبارەی سەرهەڵدانەوەی داعش وتی، “ئەو جموجوڵ و سەرهەڵدانەوەیە ئەنجامی پیلانێكە و توركیا لەو پیلانەدا بەدەر نییە، بەتایبەت لە لێدوانەكانی ئەو گروپانەی توركیا دروستیكردوون لە ناوچەكەدا و هەروەها ئەو هێرشانەی داعش كە هەن، باشتر لە پیلانەكە تێدەگەین”.
هەروەك ئامادەیی هێزەكانی گەریلای بۆ پاراستنی خاكی كوردستان لە دەستی داعش نیشاندا و وتی، “ئەگەر پێویست بە ئێمە بكات و ڕێگەمان بدرێت، ئێمە وەك هەپەگە ئامادەین گەلەکەمان لەو ناوچانە بپارێزین”.
وتەبێژی هەپەگە ئاماژەی بەوەشكرد، “ئەو هاوكارییانەی لەلایەن هاوپەیمانانەوە بۆ پێشمەرگە نێردراون لە بەرامبەر گەریلادا لە هەرێمەكانی پاراستنی مەدیادا جێگیركراون، لەكاتێكدا پێویستە ئەو هێزانە لەجیاتی ئەوەی لە دژی گەریلا بوەستێنرێنەوە، لە دژی دوژمنانی گەلی كورد جێگیركرابانایە”.
ئەوەشی خستەڕوو، تێكشكاندن و ڕووبەڕووبونەوەی داعش بە هێزی زۆر و پیشاندانی لە ڕاگەیاندنەوە نابێت، پێویستە بە یەكەی بچووك بچووك هێرشبكرێتە سەریان، هەپەگە لەو بوارەدا بە ئەزموونە و بە ئەنجام گەیشتووە.
