ڕێکخراوی تەندروستیی جیهانی هەڵمەتێکی بەرفراوان بۆ ڤاکسینکردنی هاوڵاتییانی عێراق ئەنجامدەدات، هەڵمەتەکە بۆ کوتانی 40%ـی خەڵکی عێراقە لە تەمەنە جیاوازەکان.
دکتۆر ئەحمەد زوەیتن بەرپرسی نوێنەرایەتیی ڕێکخراوی تەندروستیی جیهانی لە عێراق ڕایگەیاندووە، “وەزارەتی تەندروستیی عێراق و نوێنەرایەتیی ڕێکخراوی تەندروستیی جیهانی لە وڵاتەكە ئامادەکارییان بۆ ڕووبەڕووبوونەوەی گۆڕاوی نوێی ئۆمیکرۆن و هاتنی شەپۆلی ئەو گۆڕاوە نوێیە کردووە”.
ئاشكرایكردووە، ڕێکخراوەکەیان هەڵمەتێکی گەورەی کوتان بە ڤاکسینی کۆرۆنا لە عێراق ئەنجامدەدات بۆ ڤاکسینکردنی 40%ـی دانیشتووان، بۆ ئەو مەبەستەش بڕی سێ ملیۆن دۆلاری تەرخانکردووە و هەڵمەتەکە سەرجەم تەمەنەکانی ڕێگەپێدراو دەگرێتەوە.
بەرپرسەکەی ڕێکخراوی تەندروستیی جیهانی لە عێراق دەڵێت، دواکەوتنی گەیشتن بە ئاستێکی بەرزی ڤاکسینکردن لە وڵاتدا دەبێتەهۆی سەرهەڵدانی گۆڕاوە نوێیەکە لە عێراق و بڵاوبوونەوەی بەشێوەیەکی خێرا.
سەبارەت بە کاریگەریی ڤاکسینەکان لەسەر گۆڕاوە نوێیەکە وتی، ئەوەی تائێستا دەرکەوتووە ڤاکسینەکان بۆ سەرجەم گۆراوەکانی پێشوو کاریگەربوون و هیوادارین بۆ گۆڕاوی ئۆمیکرۆنیش هەمان ئەنجامی هەبێت.
ئاماژەی بەوەکرد، لەگەڵ وەزارەتی تەندروستیی عێراق لەهەوڵی ئەوەدان ئاستی تووشبوون بە ڤایرۆسەکە کەمبکەنەوە بۆ نزمترین ئاست، ئەوەش بە گەیاندنی ڕێژەی ڤاکسینکردنی هاوڵاتییان بۆ 80%.
