ئەو تۆمەتبارەی تەقەی لە پۆلیسی بەرەنگاربوونەوە كرد دەستگیرنەكراوە

لێكۆڵینەوە بەردەوامە و بەدواداچوون ‏دەكرێت بۆ دەستگیركردنی

ئەو تۆمەتبارەی دوێنێ لە سلێمانی تەقەی لە مەفرەزەیەكی پۆلیسی بەرەنگاربوونەوەی ‏توندوتیژیی دژی ژنان كرد، هێشتا دەستگیرنەكراوە، وتەبێژی بەڕێوەبەرایەتییەكە دەڵێت، ‏دۆخی بریندارەكان جێگیرە.‏

شەوی ڕابردوو مه‌فره‌زه‌یه‌كى پۆلیسى به‌ره‌نگاربوونه‌وه‌ى توندوتیژى دژى ژنان لە ‏سلێمانی، لەكاتی چوونیان بۆ جێبەجێكردنی بڕیاری دادوەر تایبەت بە ده‌ستگیركردنى ‏داواكراوێك له‌ ناوچه‌ى تانجه‌رۆ، تەقەیان لێكرا و بەهۆیەوە ئه‌فسه‌رێك به‌ناوى (محه‌مه‌د ‏له‌تیف) كوژرا و سێ پۆلیسی دیكه‌ش برینداربوون.‏

موقەدەم هیوا كەریم، وتەبێژی بەڕێوەبەرایەتییەكە بە تۆڕی میدیایی ئێستای ڕاگەیاند، ‏تۆمەتباری ڕووداوەكە هێشتا دەستگیرنەكراوە، لێكۆڵینەوە بەردەوامە و بەدواداچوون ‏دەكرێت بۆ دەستگیركردنی.‏

دەربارەی ئەوەی لە پەلامارەكەدا هەر تۆمەتبار بەشداربووە، یان كەسی دیكەش هەبوون، ‏موقەدەم هیوا وتی، “نازانرێت و هێشتا ڕووننەبووەتەوە، وردەكارییەكەی لای پۆلیسی ‏سلێمانییە”.‏

سەبارەت بە بریندارەكان، وتەبێژی بەڕێوەبەرایەتیی بەرەنگاربوونەوەی توندوتیژی وتی، ‏دۆخی تەندروستیی بریندارەكان باشە.‏

بابەتی پێشتر

تەندروستیی جیهانی گەورەترین هەڵمەت بۆ ڤاکسینکردنی 40%ـی عێراقییەکان ئەنجامدەدات

بابەتی دواتر

قوربانییانی گڕكانەكەی ئیندۆنیسیا 100 كەسی تێپەڕاند

بابەتی پەیوەندیدار