وەزارەتی تەندروستیی ئیسرائیل بڕیاریدا لە چەند ڕۆژی داهاتوودا هەڵمەتی ڤاكسینكردنی منداڵانی تەمەن پێنج تاوەكو 11 ساڵ دەستپێبكات دژی كۆرۆنا.
لە ڕاگەیەندراوێكدا وەزارەتی تەندروستیی ئیسرائیل ڕایگەیاندووە، لە ماوەی چەند ڕۆژی داهاتوودا کاتی دەستپێکردنی هەڵمەتی خۆڤاكسینكردنی منداڵانی تەمەن 5 بۆ 11 ساڵ ڕادەگەیەندرێت و ڤاکسینی فایزەر – بایۆنتێکیان پێدەدرێت.
تەندروستیی ئێسرائیل دڵنیاییشی داوە، “زۆرینەی شارەزایان پێیانوابووە سوودەکانی ڤاكسینكردنی منداڵانی تەمەن پێنج بۆ 11 ساڵ لە مەترسییەکانی زۆر زیاترە”.
بەپێی داتاكان لە کۆی 9.4 ملیۆن دانیشتووی ئیسرائیل، 1.2 ملیۆنیان منداڵانی تەمەن 5 بۆ 11 ساڵن، بۆیە بەرپرسانی تەندروستیی ئەو وڵاتە جەخت لەوەدەكەنەوە، پێویستە ئەو تەمەنانەش خۆیان ڤاكسین بكەن.
هەر بەپێی داتاكانی وەزارەتی تەندروستیی ئیسرائیل، 5.7 ملیۆن كه‌س خۆیان ڤاكسینكردووە له كۆی 9.4 ملیۆن دانیشتوو، كە دەكاتە ڕێژەی 80%، هەروەها زیاتر له 4 ملیۆن كه‌سیش ژەمی سێیەمی ڤاكسینیان وەرگرتووە.
