وەزارەتی تەندروستیی هەرێمی کوردستان، ئەمڕۆ سێشەممە 20ی تشرینی یەکەم، ڕێککەوتنێکی لەگەڵ ڕێکخراوەکانی نەتەوەیەکگرتووەکان واژووکرد بەمەبەستی هاتنی تیمێکی تەندروستیی یونامی بۆ چارەسەرکردنی توشبووانی کۆرۆنا لە هەرێمی کوردستان.
وەزیری تەندروستی وتیشی کە ئەمە یەکەم جار نییە نەتەوەیەکگرتووەکان ستایشیی تەندروستیی هەرێمی کوردستان دەکات لە ڕوبەڕووبوونەوەی کۆرۆنادا، دوای ئەم ڕێککەوتنەش نەخۆشخانەکانی هەولێر دەبنە ئەو ناوەندانەی کە تیمی یونامی چارەسەری توشبووانی کۆرۆنای تێدا دەکەن.
دکتۆر سامان بەرزنجی ئاماژەی بەوەکرد، پزیشکان و کارمەندانی تەندروستی لە هەرێمی کوردستان لە ئاستێکی زانستیی و پزیشکیی بەرزدان بەجۆرێک کە ئەگەر لە پزیشکان و کارمەندانی وڵاتانی پێشکەوتوو باشتر نەبن خراپتر نین.
“ئێمە لە ژێر چاودێری نەتەوەیەکگرتووەکان و ڕێکخراوی تەندروستیی جیهانی تاوەکو ئێستا چەند جارێک پرۆتۆکۆڵی چارەسەرکردنی توشبووانی کۆرۆنامان گۆڕیوە، بە باشترین ڕێکارەکانی چارەسەر لەسەر ئاستی جیهان” وەزیری تەندروستیی هەرێم وای وت.
لە هەرێمی کوردستان تاوەکو ئێستا، 61 هەزار 703 کەس توشی کۆرۆنا بوون بەپێی ئامارە فەرمییەکان، لەو ژمارەیەش 2 هەزار و 187 كەس گیانیانلەدەستداوە، كە زۆرترینیان لە پارێزگای سلێمانی بوون كە هەزار و 90 گیانیان لەدەستدانە.
