حاجی حامد جێگری ئەبوبەكر بەغدادی سەرۆكی كوژراوی ڕێكخراوی داعش، باس لە سەرچاوەكانی داهاتی ڕێكخراوەكە و بڕی پارە و ئاڵتونەكانی دەكات و تێچووی هەر ئۆتۆمبێلێكی بۆمبڕێژكراو ئاشكرادەكات.
جێگرەكەی بەغدادی كە ئێستا لەلایەن دەسەڵاتدارانی عێراقەوە دەستبەسەرە، چەندین زانیاری لەبارەی سەرچاوەكانی داهاتی داعش ئاشكراكردووە كە ڕۆژنامەی “قەزا” بڵاویكردوونەتەوە و ڕایگەیاندووە، سەرەتا داعش مانگانە 500 هەزار دۆلار سەرانەی لە دوكاندار و كاسبكارانی موسڵ وەرگرتووە، دواتر بڕەكەی بۆ یەك ملیۆن دۆلار زیادكردووە.
باسی لەوەشكردووە كە دوای كوژرانی ئەمیری دارایی داعش لە ئەنبار، ئەم خراوەتە شوێنەكەی و توانیویەتی لەماوەی دوو ساڵدا داهاتی داعش بگەیەنێت بە یەك ملیار و 250 هەزار دۆلار.
حاجی حامد ئاشكرایكردووە كە داعش سێ هەزار تۆن ئاڵتون و دەیان كێڵگەی نەوتی لە عێراق و سوریا هەبووە و وەك سەرچاوەی دەوڵەمەندی داهات سوودی لێوەرگرتوون.
بەپێی وتەی حاجی حامد جێگری ئەبوبەكر بەغدادی، هەر ئۆتۆمبێلێكی بۆمبڕێژكراو 30 هەزار دۆلاری تێچووە تا ئامادەكراوە بۆ تەقاندنەوە.
