ڕۆژنامەی بێڵدی ئەڵمانی ڕایگەیاند، 73 هەزار کورد لە باشوری کوردستانەوە خۆیان گەیاندووەتە تورکیا و لەوێوە بەرەو ئەوروپا چوون، یان لە سنوری بیلاڕوسیا و پۆڵەندان.
ڕۆژنامەکە لە ڕاپۆرتێکدا لەبارەی کۆچی کوردانی هەرێمی کوردستانەوە نوسیویەتی، “ئایا ئەوانەی ئێستا لەسەر سنور گیریانخواردووە هەموویان پەنابەری سیاسین؟ لە کاتێکدا هیچ زوڵمێکی دەرەکی لەسەر کوردانی باشور نییە و ئێستا خەڵکی لە ئەوروپاوە گەشت دەکەن بۆ هەرێمی کوردستان”.
لەگەڵ ئەوەش ڕۆژنامەکە دەڵێت، “هەزاران کەس لە هەرێمی کوردستان بەهۆی هەژاری و بێ کارییەوە ژیانیان قورس بووە و %18ی خەڵکی لە هەرێمەکەدا هەژارن”.
بێڵد، هۆکاری کۆچی کوردانی هەرێمی کوردستانی بەستووەتەوە، بە پلانێکەوە دژی یەکێتی ئەوروپا، کە لەلایەن تورکیا و ئەلیکسەندەر لۆکاشینکۆی سەرۆککۆماری بیلاڕوسیاوە داڕژراوە، چونکە کۆی کۆچبەرەکان لە تورکیاوە چوونەتە بیلاڕوسیا.
ڕۆژنامەکە ڕاشیگەیاندووە، “ئەو کۆچبەرانەی ئێستا لە سنوری پۆڵەندان، هەموویان لەلایەن لۆکاشینکۆوە بەقاچاخ هێنراونەتە سنورەکانی ئەوروپا”.
