جارێکی دیکە لە فەرمانگەکاندا کاتی مامەڵەی هاوڵاتییان بۆ پاسپۆرت گۆڕانکاری بەسەرداهات

بەڕێوەبەرایەتیی پاسپۆرتی سلێمانی ڕایگەیاند، جارێکی دیکەی کاتی مامەڵەی هاوڵاتییان بۆ پاسپۆرت گۆڕانکاریی بەسەردا هاتووە و کاتژمێرێک دواخراوە.

بەپێی ڕاگەیەندراوێكی بەڕێوەبەرایەتیی پاسپۆرتی سلێمانی، ”تا ڕۆژی پێنجشەممە 11ی ئەم مانگە، هاوڵاتییان بۆ مامەڵەی دەرهێنان و نوێکردنەوە و وەرگرتنەوەی پاسپۆرت، پێویستە لە کاتژمێر 3:00ی ئێوارە بۆ 7:00ی ئێوارە بێت”.

ئەم ڕێنماییە کۆی نووسینگەکانی پاسپۆرت دەگرێتەوە لە پارێزگاكانی سلێمانی و هەڵەبجە، واتە (نووسینگەی پاسپۆرتی سلێمانی/1 – نووسینگەی پاسپۆرتی سلێمانی/2 کەلار – نووسینگەی پاسپۆرتی سلێمانی/3 ڕاپەڕین – نووسینگەی پاسپۆرتی سلێمانی/5 چەمچەماڵ)ی پاسپۆرتی پارێزگای سلێمانی و هەروەها بەڕێوەبەرایەتیی پاسپۆرتی هەڵەبجە).

پێشتریش بەهۆی ڕێنمایی نوێی بەغدادەوە کاتی مامەڵەی هاوڵاتییان بۆ پاسپۆرت لە کاتی بەیانییەوە گۆڕابوو بۆ کاتژمێر 2:00 بۆ کاتژمێر 6:00ی ئێوارە.

هۆکاری ئەم گۆڕانکارییە، پێشتر لەلایەن پاسپۆرتی سلێمانییەوە بۆ ڕێنمایی نوێی حكومەتی فیدراڵی و هەروەها بوونی کێشەیەک لە بەغدادەوە گەڕێندرابوویەوە، کە ئەوانی ناچارکردووە دەرهێنان و نوێکردنەوە و وەرگرتنەوەی پاسپۆرت بخەنە ئەو کاتەوە.