لەگەڵ بەردەوامی ڕۆشتنی کۆچبەران بەرەو سنووری پۆڵەندا، ئەو وڵاتە بڕیاریداوە دیوارێک لەسەر سنوورەکانی دروستبکات، دژی جووڵەی کۆچبەران.
پەرلەمانی پۆڵەندا دەنگی لەسەر دروستکردنی دیوارەکە داوە و بڕیارە دەست بە دروستکردنی بکرێت، بەتایبەت لەو شوێنانەوە کە کۆچبەران لێوەی دزەدەکەن.
یەکێتیی ئەوروپا جارێکی دیکە وڵاتی بیلاڕوسیای تۆمەتبارکرد بەوەی دەیەوێت ئەوروپا پڕبکات لە کۆچبەر.
ئەو پڕۆژەیاسایەی کە پەرلەمانی پۆڵەندا پەسەندیکردووە، دیوارێکی 5.5 مەتر بەرزییە و بەدرێژایی سنوورەکە دروست دەکرێت، تێچووی دیوارەکەش 400 ملیۆن دۆلارە.
لەناو پڕۆژەیاساکەدا هاتووە، “دیوارەکە بە سیستمێکی زیرەک دەبەسترێتەوە و کامێرا و دەیان خاڵی چاودێریی هەستیاری تێدایە، کە لەکاتی نزیکبوونەوەی مرۆڤ، لێدەدات و داتا سەنتەرەکە ئاگادار دەکاتەوە.
حکومەتی پۆڵەندا دەڵێت، “ئێستا ڕۆژانە 500 کەس دەیانەوێت لە سنوورەکانی بیلاڕوسیاوە بێنە پۆلەنداوە، لەکاتێکدا ساڵی ڕابردوو تەنها 120 كەس بە نایاسایی لە بیلاڕوسیاوە چوونەتە پۆڵەندا”.
