دوای گەیشنی پاڵاوگەیەکی بەرهەمهێنانی بەنزین بە پارێزگای سلێمانی، بڕیارە لە پێنج مانگی داهاتوودا ڕۆژانە 850 هەزار لیتر بەنزین لە جۆری “موحەسەن” بەرهەمبهێنرێت.
لە لێدوانێکدا بۆ تۆڕی میدیایی ئێستا، دابان محەمەد بەڕێوەبەری ناحیەی عەربەت ڕایگەیاند، ئەو پاڵاوگەیەی لە سنووری ناحیەی عەربەت دانراوە “درێژیی یەکێک لە بۆرییەکانی 60 مەتر و ئەوی دیکەیان 43 مەترە و بەمەبەستی دروستکردنی پاڵاوگەیەکی بەنزین هێنراونەتە ناوچەکە، توانای بەرهەمهێنانی پاڵاوگەکە 850 – 900 هەزار لیتر بەنزین دەبێت لە ڕۆژێکدا”.
ڕاشیگەیاند، “پاڵاوگەکە لەلایەن کۆمپانیای کەرتی تایبەتەوە دروستدەکرێت، بەڵام تائێستا هەنگاوەکانی دروستکردنی ئەو پاڵاوگەیە لەسەرەتادان”.
ئەو پاڵاوگەیەی دروستدەکرێت لە گوندی (یەخی ماڵی)ی سەر بە ناحیەی عەربەت دەبێت و بەنزینی بەرهەمهێنراویشی بۆ پارێزگای سلێمانی دەبێت.
