یانەی مانچستەر سیتی لە گواستنەوەکانی هاوینەی 2021 هەوڵەکانی بە ئاڕاستەی ئێرلینگ هالاند، پاشان هاری کەین دەستپێکرد، سوورن لەسەر کڕینی هێرشبەرێک و تاوەکو ئەم ساتە دەستبەرداری بابەتی گواستنەوەی هاری کەین نەبوون.
ڕۆژنامەی “ئەی ئێس” لەزاری “ئەتلەتیک”ەوە بڵاویکردووەتەوە، گالاکتیکۆسی گواردیۆلا لەم وەرزەدا تەنها بە کڕینی جاک گرلیش و هاری کەینەوە ناوەستێت، بەڵکو چاویان بڕیوەتە لاوێکی بەهرەداری ئینگلیزی کە چوار خول لەخوار خولی نایابی ئینگلیزییەوە یاریدەکات.
ئەو لاوەی گواردیۆلا و تیمەکەی چاویان تێبڕیوە ناوی کایل هودلینە، بەرزيی باڵای دوو مەتر و شەش سانتیمەترە هاوشێوەی لیبرۆن جەیمس، ئەفسانەی باسکەی ئەمریکا، وەرزی ڕابردوو لەتەمەنی 21 ساڵیدا توانیویەتی 10 گۆڵ تۆماربکات.
زۆرینەی میدیاکانی بەریتانیا هودلین بە پڕۆژەی نوێکردنەوەی چیرۆکی پیتەر کراوچیى هێرشبەری پێشووی ئینگلتەرا و لیڤەرپوڵ ناودەبەن، کە توانی لە پریمەرلیگ مێژوو تۆماربکات.
ماڵپەڕی ئەتلەتیک نووسیویەتی، سیتی بەردەوامە لە کۆکردنەوەی گەوهەرەکانی بەریتانیا و سەرباری هەوڵدانی یانەکانی میڵدزبرۆ و کاردیف سیتی، بەڵام لەکۆتاییدا سیتی و گواردیۆلا سەرکەوتوو دەبن لە کڕینی هودلین.
