كۆشکی سپی ئەمریکا ڕایگەیاند، ڕۆژی دووشەممە جۆ بایدن پێشوازی لە مستەفا کازمی، سەرۆک وەزیرانی عێراق دەکات و گفتوگۆ لەسەر چەند پرسێكی تایبەت دەكەن.
جین ساكی، وتەبێژی کۆشکی سپی ئەمڕۆ لە کۆنگرەیەکی ڕۆژنامەوانیدا ئاشكرایكرد، ڕۆژی دووشەممە 26-ی تەمموز جۆ بایدن سەرۆکی ئەمریکا لە کۆشکی سپی پێشوازیی لە مستەفا کازمی سەرۆک وەزیرانی عێراق دەکات.
ڕوونیشیكردەوە، هەردوو سەرۆك گفتوگۆ لەبارەی هاوبەشی ستراتیژی نێوان هەردوو وڵات و چەند مەلەفێكی دیكە دەكەن، لەوانەش ڕوبەڕوبوونەوەی داعش، ئابوری، پەروەردە و فێرکردن.
فوئاد حسێن وەزیری دەرەوەی عێراق چەند ڕۆژێكە و پێش كۆبوونەوەكەی 26ی مانگی نێوان جۆ بایدن و مستەفا كازمی لە ئەمریكایە و ڕایگەیاند، پرسی کشانەوەی سەربازانی ئەمریكا لە عێراق یەکێک لە تەوەرە سەرەکییەکانی گفتوگۆکانی نێوان مستەفا كازمی و جۆ بایدن دەبێت.
باسی لەوەشكردبوو، لە دانوستانەکاندا ڕێککەوتن لەسەر خشتەیەکی كاتی بۆ کشانەوەی هێزەکانی ئەمریکا دەکرێت.
