لیۆن گۆرێتزکا، ئەستێرەی ئەڵمانی ئامادەنەبووە بۆندەکەی لەگەڵ بایرن میونشن بەهەمان مەرجی وەرزەکانی ڕابردوو نوێبکاتەوە.
ڕۆژنامەی بێلد سپۆرتی ئەڵمانی بڵاویکردووەتەوە، دوای گواستنەوەی لیرۆی سانێ لە یانەی مانچستەر سیتی و جێبەجێکردنی تەواوی مەرجەکانی، یاریزانانی یانەی بایرن میونشن پێیانوایە یانەکەیان دەبێت بەهەمان شێوە مامەڵەیان لەگەڵدا بکات.
بەپێی سەرچاوەکە، کینگسلی کۆمانی فەرەنسی یاخیبوونی ڕاگەیاندووە، بۆندەکەی نوێناکاتەوە و داوای هەمان ئەو مامەڵەکردنەی کردووە، کە بەڕێوەبەرانی بایرن لەگەڵ سانێ کردوویانە، پاشان داڤید ئالابا هەمان مەرجی هەبووە و کۆتاییەکەشی بە جیابوونەوە کۆتاییهاتووە.
لە ئێستادا لیۆن گۆرێتزکا، ئەستێرەی ئەڵمانی پێداگریکردووە، کە بۆندەکەی بە هەمان مەرج و بەندەکانی لیۆی سانێ نوێدەکاتەوە، واتا لە ڕووی داراییەوە زیاتر داوادەکات.
سپۆرت بێلد نوسیویەتی، بارودۆخەکە زۆر لەوە ئاڵۆزترە کە ئاماژەی بۆدەکرێت، چونکە کۆمان و گۆرێتزکا تەنها وەرزێک لە بۆندەکانیاندا ماوە، ئەگەر بەڕێوەبەرانی بایرن هەمان هەڵوێستی ئالابا بەرامبەریان دووبارەبکاتەوە، بەدوور نازانرێت ئەو یاریزانانەش هاوشێوەی ئالابا بەبێ سوودی دارایی ڕوو لە یانەیەکی دیکە بکەن.
