ئیدارەی نوێی یانەی نیوکاسڵ بۆندێکیان بۆ گواستنەوی ئیدین هازارد پێشکەشی یانەی ڕیاڵ مەدرید کردووە، یانە ئیسپانییەکە بە ئۆفەرەکە قایلبووە و هازارد ڕەتیکردووەتەوە.
ڕۆژنامەی ئیل ناسیوناڵی ئیسپانی ئاشکرایکردووە، لەم هەفتەیەدا خاوەنداریەتیی سعودیی یانەی نیوکاسڵ بۆندێکیان بەبڕی 40 ملیۆن یورۆ بۆ گواستنەوەی ئیدین هازارد پێشکەشی ڕیاڵ مەدرید کردووە، فلۆرنتینۆ پێرێزی سەرۆکی ڕیاڵ و هاوکارانی وەڵامیان ئەرێنی بووە، لەبەرامبەردا یاریزانەکە ڕەتیکردووەتەوە پەیوەندی بە یانەیەکی بچووکتر لە ڕیاڵ مەدریدەوە بکات.
Real Madrid have accepted a bid from Newcastle United for Eden Hazard but the winger does not want to move, according to reports in Spain.#NUFC
— WONDERSCOTTY (@PaulS564) January 17, 2022
بەپێی سەرچاوەکە، ئیدارەی ماگپایس مووچەی ساڵانەیان بەبڕی 10 ملیۆن یورۆ بۆ یاریزانەکە پێشکەشکردووە، بەڵام ناوبراو خەونی ئەوەیە لەدەرگای یانەی چێڵسی-یەوە بگەڕێتەوە بۆ خولی نایابی ئینگلتەرا، بەوپێیەی لەو یانەیە لە 352 یاریدا 110 گۆڵ و 92 ئەسیستی وەک مێژوویەک تۆمارکردووە.
ئیدین هازارد لە هاوینی 2019 بەبڕی 100 ملیۆن یورۆ یانەی چێڵسی بەجێهێشت و درێسی یانەی شاهانەی پۆشی، بەهۆی دوورکەوتنەوە و پێکانە یەکلەدوایەکەکانەوە نرخەکەی بۆ 40 ملیۆن یورۆ دابەزیوە.
