وەزارەتی کۆچی عێراق، جەختیکردەوە دوای ئەوەی ساڵی 2014 ژمارەی ئاوارەکان لە عێراق گەیشتە 725 هەزار ئاوارە، لەمساڵدا ژمارەکە بۆ 37 هەزار کەمبووەتەوە.
کەریم نوری بریکاری وەزیری کۆچ و کۆچبەرانی عێراق بە ئاژانسی هەواڵی فەرمیی عێراقی ڕاگەیاندووە، لە هەرێمی کوردستان 26 کامپی ئاوارە هەیە، 16یان لە دهۆک، شەشیان لە هەولێر و چواریان لە سلێمانین.
وەزارەتی کۆچ ڕاشیگەیاندووە، بەپێی دوایین ئامار ژمارەی ئاوارەکانی عێراق 37 هەزار ئاوارەن، کە زۆرینەیان لە هەرێمی کوردستانن و ژمارەیان 30 هەزار ئاوارە دەبن و زۆرینەیان ئاوارەی شەنگال و ناوچەکانی دەوروبەرین، ئەو ژمارە ئاوارەیەی دیکە کە دەمێنێتەوە لە کامپی فەلوجە لە ئەنبار و جەدعەن لە نەینەوا.
بریکاری وەزارەتی کۆچ دەڵێت، ژمارەیەکی زۆر لە ئاوارەکان لە چەند مانگی کۆتاییدا گەڕاونەتەوە بۆ شوێنەکانی خۆیان و لەبەرئەوەش 50 کامپ داخراون.
ژمارەیەک لە ئاوارەکانیش لەو ناوچانەی ڕوویان تێکردووە نیشتەجێبوون و ناگەڕێنەوە شوێنەکانی خۆیان، بەڵام سەبارەت بە ئاوارە سورییەکان “مەبەست لێی ئاوارەکانی ڕۆژئاوای کوردستانە” دەڵێت، شوێنێکی تایبەتیان هەیە لەژێر سەرپەرشتیی وەزارەتی کۆچ و کۆچبەران.
باسی لەوەشکردووە، “وەزارەتەکەمان لە چوارچێوەی بەرنامەی حکومەتدا بۆ گەڕاندنەوەی ئاوارەکان کاردەکان بۆ گەڕانەوەی ئاوارەکان بۆ شوێنەکانی خۆیان، لەگەڵئەوەشدا ئەگەر ئاوارەیەک یان خێزانێک بەهۆی کێشەی کۆمەڵایەتی و ئەمنییەوە نەتوانێت بگەڕێتەوە، بەهاوکاری و هەماهەنگی لەگەڵ ڕێکخراوە نێودەوڵەتییەکان هەوڵدەدەین بارگرانییەکانی سەرشانیان کەمکەینەوە و هاوکارییان بکەین”.
