چوار كاتیۆشا لە ناوچەی سەوزی بەغداد كەوتنەوە

یەكێكیان لەنزیك باڵیۆزخانەی ئەمریكا كەوتووەتە خوارەوە

سەرچاوە ئەمنییەكان ڕایدەگەیەنن، چوار مووشەكی كاتیۆشا لە ناوچەی سەوزی بەغداد كەوتوونەتەوە.

میدیا عێراقییەكان ئەمڕۆ سێشەممە 17ی تشرینی دووەم لەسەر زاری سەرچاوە ئەمنییەكانەوە بڵاویانكردەوە، ئێوارەی ئەمڕۆ بۆردومانێكی مووشەكی باڵیۆزخانەی ئەمریكای لە ناوچەی سەوزی بەغداد كردوەتە ئامانج.

بەپێی سەرچاوەكان، سێ مووشەك لە ناوچەی چادرییە كەوتوونەتە خوارەوە و مووشەكی چوارەمیش لە ناوچەی سەوز و نزیك لە باڵیۆزخانەی ئەمریكا كەوتووەتەوە و دواتریش زەنگی ئاگاداركردنەوە بیستراوە.

لەماوەی نزیكەی پێنج هەفتەی ڕابردوودا ئەمە یەكەم هێرشە دەكرێتەوە سەر ناوچەكە، پاش ڕاوەستاندنی هێرشەكان لەلایەن ئەو گروپەی بە “مقاوەمەی عێراقی- بەرگری عێراقی” ناودەبرێت لە 10ی تشرینی یەكەمی ڕابردوو بۆ سەر هێز و بەرژەوەندییە بیانییەكان و بەتایبەتیش ئەمریكا لە عێراق بەمەبەستی پێدانی دەرفەت بۆ كشانەوەیان لە وڵات.

“مقاوەمەی عێراقی” لایەنێكی نەناسراوە، بەڵام پێشبینی دەكرێت گروپە شیعییە چەكدارەكانی نزیك لە ئێران لەنێویشیاندا “كەتیبەكانی حزبوڵا” و “عەسائیب ئەهل حەق” و “بزوتنەوەی نوجەباء” بگرێتەوە.

ڕاگەیاندنی ڕاوەستانی هێرشەكان پاش هەڕەشەكانی واشنتن هات بە داخستنی باڵیۆزخانەكەی لە بەغداد.

بەردەوام ئەمریكا گروپە چەكدارییەكانی نزیك لە ئێران بە هێرش بۆ سەر بەرژەوەندییەكانی لە عێراق تۆمەتباردەكات.

بابەتی پێشتر

ئەمریكا بڕیاری كەمكردنەوەی هێزەكانی لە عێراق و ئەفغانستان دەركرد

بابەتی دواتر

كازمی: دەمانەوێت هەڵبژاردنێكی پاك و بێگەرد ئەنجام بدەین

بابەتی پەیوەندیدار
Total
48
Share