شەوی ڕابردوو لەگەڵ بەردەوامیی خۆپیشاندانەکان دژی گروپە چەکدارەکانی نزیک لە ئێران و سوتاندنی بەشێک لە کونسوڵخانەی ئێران لە کەربەلا، دەستڕێژی گولـلە لە پەیامنێری کەناڵی فورات کرا و بەسەختی بریندارکرا.
شەوی ڕابردوو ئەحمەد حەسەن، پەیامنێری کەناڵی فورات لە نزیک ماڵەکەی خۆی، هاوشێوەی ئیهاب وەزنی، چالاکوانی خۆپیشاندانەکانی تشرین، لە نزیک ماڵەکەی خۆی تەقەی لێکرا و بەسەختی بریندارکرا.
بەپێی هەواڵێکی کەناڵی فورات، پەیامنێرەکەیان بەسەختی بریندارکراوە و یەکێک لە گولـلەکان بەر سەری کەوتووە.
خۆپیشاندەرانی کەربەلا، هەوڵی کوشتنی چالاکوان و ڕۆژنامەنووسان دەخەنە پاڵ گروپەکانی نزیک لە ئێران و تۆمەتباریان دەکەن بەوەی، چاوترسێنی خەڵکی دەکەن، کە دژی هیچ بەرژەوەندییەکی ئەوان دەنگ هەڵنەبڕن.
