سەنتەری گاماڵیا-ی ڕوسی، كە بەشدار بوو لە بەرهەمهێنانی ڤاكسینی سپۆتنیك V، دڵنیایە لەوەی ڤاكسینەكە دەتوانێت خەڵك لە زنجیرەی كۆرۆنا هیندییەكەش بپارێزێت.
بڵاوبوونەوەی زنجیرەیەكی نوێی كۆرۆنا لە هیندستان، كە بە كۆرۆنای هیندی ناسراوە و چەند وڵاتێكی دیكەشی گرتووەتەوە، ترسی گەورەی لە جیهاندا دروستكردووە، بەو پێیەی خێراتر لە كۆرۆنا بنەڕەتییەكە بڵاودەبێتەوە و كوشندەترە، لەو نێوەندەدا وڵاتی هیندستان ماوەیەكە گیرۆدەی ئەو زنجیرە نوێیەی ڤایرۆسەكەیە و ڕۆژانە سەدان هەزار كەس توشدەبن و گیانلەدەستدەدەن.
ئەلیكساندەر گینتسبۆرگ بەڕێوەبەری سەنتەری گاماڵیا-ی ڕوسی بۆ پەتا و زانستی زیندەوەرزانیی ورد، قسەی بۆ ئاژانسی نۆڤۆستی كردووە، رایگەیاندووە، ڤاكسینی سپۆتنیك V دژی ئەو زنجیرە نوێیەی كۆرۆنا هیندییەكەش كاریگەرە، چونكە وەرگرتنی دوو ژەم لەو ڤاكسینە ئاستێكی بەرزی دژەتەن و توانای بەرگری لە لەشی وەرگرەكەدا دروستدەكات.
بۆیە ئەو بەرپرسە پزیشكییەی ڕوسیا دڵنیایە لەوەی، تەنانەت ئەگەر ڤایرۆسەكە توانای خۆگۆڕینیشی هەبێت، ڤاكسینەكەیان دەتوانێت بەرەنگاری ببێتەوە.
