پۆلیسی هەولێر ئاشكرایكرد، کەسێکیان بە تۆمەتی ساختەکاری دەستگیرکردووە، كە لە ماڵەكەیدا “329 مادە و جۆری جیاوازی ساختەکاری دەستیان بەسەردا گیراون”.
لە ڕاگەیەنراوەکەی پۆلیسدا هاتووە ئەو تۆمەتبارە چەندین جۆر ناسنامەی پێبووە کە پێکهاتبوون لە، “مۆر و بەڵگەنامەی ساختەکراو تایبەت بە هەردوو حکومەتی هەرێمی کوردستان و حکومەتی عێراق، کونسوڵخانەکان، مۆری تەواوی خاڵەسنورییەکان، ناسنامەی سەربازی و کڵێشەی نوسراوی دادگا”.
“هەروەها چەندین نوسراوی ساختەی وەرگێڕدراو بۆ سەر زمانی ئینگلیزی و نوسراوی ساختەی پەیوەندییەکانی دەرەوە و مۆری فڕۆکەخانەکان دەرچوون و هاتن، ناسنامەی چەندین وەزارەت، کڵێشەی بەتاڵی ناسنامە و کارتی زانیاری و چەندین بەڵگەنامە و ناسنامەی دیکەی ساختەکراوی پێگیراوە”، وەك پۆلیسی هەولێر ئاشكرایكردووە.
ئەوەش ڕاگەیەنراوە، تۆمەتبارەكە “پەڕاوی لێكۆڵینەوە و فەرمانی دەستگیركردن و مۆری دادگا و دادوەر و پولی ناوخۆ و دەرەوە و بڕوانامەی ساختە و نوسراوی پرۆتۆكۆلی ساختە بۆ بازگەكان پێبووە كە لەم ڕێیەوە ڤیزای وڵاتانی بۆ خۆی و كەسانی نزیكی وەرگرتووە”.
پۆلیسی هەولێر دەڵێت، تۆمەتبارەكە دانی بە تاوانەكەیدا ناوە و پەڕاوی لێكۆڵینەوە بۆ ڕوداوەكە كراوەتەوە.
