لیژنەی ناوبژیوانانی سەر بە یەکێتی تۆپی پێی ئیسپانیا بەفەرمی وەڵامی سکاڵایەکی یانەی بەرشلۆنە دەداتەوە و دووپاتیدەکەنەوە، جیل مانزانۆی ناوبژیوان باشترین بڕیاریداوە کە حاڵەتی بەریەککەوتنی نێوان فێرلاند مێندی و مارتن برەیزوایتی بە پەناڵتی ئەژمارنەکردووە.
بەپێی زانیاریەکانی ئێزگەی “کادینا سێر” ستافی یانەی بەرشلۆنە ڕەخنەی توندیان لە ئاستی جیل مانزانۆی ناوبژیوانی کلاسیکۆ هەبووە، پێیان وابووە چەندین هەڵەی کردووە و بەوهۆیەوە ئەنجامی کلاسیکۆ لە بەرژەوەندی یانەی شاهانە یەکلاییبووەتەوە، بۆ ئەم مەبەستەش بەفەرمی سکاڵایان لەبەردەم لیژنەی ناوبژیوانانی لالیگا تۆمارکردووە.
لیژنەی ناوبژیوانان لە داوەرانی ئیسپانیا و سەرپەرشتیاران پێکدێن کە لە هەموو شار و ناوچەکانی ئیسپانیا بەشدارییان تێداکردووە، واتا لە یەک کاتدا ناوبژیوانانی شارەکانی هەرێمی مەدرید و هەرێمی کەتەلۆنیاشی تێدایە بۆیە وەڵامدانەوەی فەرمییان بۆ یانەی بەرشلۆنە یەکلاکەرەوە بووە.
لیژنەی ناوبژیوانان بە فەرمی لە ڕاگەیانراوێکدا دووپاتیانکردووەتەوە، دوای لێکدانەوەی تەواوی حاڵەتەکان بۆیان دەرکەوتووە جیل مانزانۆ تەواوی بڕیارەکانی دروست و یاسایی بوون، بەتایبەت بەریەککەوتنی نێوان مێندی و برەیزوایت لەناو ناوچەی سزای ڕیاڵ مەدرید نەگەیشتووەتە ئەو ئاستەی بڕیاری پەناڵتی لەسەربدرێت.
