ڕاڵف ڕانیک، ڕاهێنەری بەتوانای ئەڵمانی ڕەتیدەکاتەوە پۆستی ڕاهێنەرایەتی یانەی شالکە وەربگرێت.
یانەی شالکە لەم وەرزەدا لە ئاستێکی زۆر خراپدابووە و بە کۆکردنەوەی تەنها 10 خاڵەوە خزاونەتە کۆتا پلەی ڕیزبەندی یانەکانی بوندس لیگ (پلەی 18) و دابەزینیان بۆ خولی پلە دووی ئەڵمانیا ئەگەرێکی زۆر بەهێزە.
بۆ ئەم مەبەستە ئیدارەی یانە هەوڵەکانیان بۆ گەڕاندنەوەی ڕانیک دەستپێکردووە، بەڵام ناوبراو لەڕێگەی لێپرسراوی کارەکانیەوە دووپاتیکردووەتەوە، لە بارودۆخێکی هێندە سەختدا ناتوانێت شاهانەی شالکە بگەڕێنێتەوە پێگەی ئاسایی خۆی، واتا پۆستەکەی ڕەتکردووەتەوە.
ڕۆژنامەی بێلد سپۆرتی ئەڵمانی ئەم هەنگاوەی بە پەیامێک بۆ فیدراسیۆنی تۆپی پێی ئەڵمانیا وەسفکردووە، تیایدا بەڕوونی دەردەکەوێت ڕاهێنەرە کارەمەکە خەونی بەدەستهێنانی پۆستی ڕاهێنەری هەڵبژاردەی ئەڵمانیای هەیە دوای ئەوەی یواکیم لۆوڤ لە هاوینی داهاتوو دەستلەکاردەکێشێتەوە.
