ئه‌نجومه‌نی وه‌زیرانی هه‌رێمی كوردستان كۆبووەوە، بڕیارە لە كۆبوونەوەكەدا ڕەشنوسی چەند پرۆژەیاسایەك تاووتوێ بكات.
بەپێی ڕاگه‌یه‌ندراوی فه‌رمانگه‌ی میدیا و زانیاریی حكومه‌تی هه‌رێمی كوردستان سەبارەت بە ناوەڕۆكی كۆبوونەوەكە، ئەمڕۆ چوارشەممە 24ی شوبات، ئەنجومەنی وەزیرانی هەرێم به سه‌رپه‌رشتیی مه‌سرور بارزانی، سه‌رۆكی حكومه‌ت كۆدەبێتەوە و “چەند پرسی گرنگ” تاووتوێ ده‌كات.
ئەوەش ئاشكراكراوە، كۆبوونه‌وەكە‌ی ئه‌مڕۆ دوو بڕگه ده‌بێت، بڕگه‌ی یه‌كه‌م تایبه‌ت ده‌بێت به پرسی خستنه‌ڕووی دوا پێشهاته‌كانی پڕۆژه بودجه‌كانی فیدڕاڵ و هه‌رێم بۆ ساڵی 2021.
له بڕگه‌ی دووه‌می كۆبوونه‌وه‌كه‌شدا، ئه‌م پرسانه‌ی خواره‌وه تاووتوێ ده‌كرێن؛
خستنه‌ڕووی ڕەشنوسی ئه‌م پڕۆژه یاسا و په‌یڕه‌وانه؛
ڕەشنوسی هه‌مواركراوی یاساكانی (یه‌كێتیی ژووره‌كانی بازرگانی و پێشه‌سازی، وه‌زاره‌تی بازرگانی و پیشه‌سازی و یاسای بازرگانی).
ڕەشنوسی پڕۆژه په‌یڕه‌وی پێدانی هاوبه‌شیكردنی نێوان كه‌رتی گشتی و كه‌رتی تایبه‌ت له هه‌رێمی كوردستان.
ده‌نگدان له‌سه‌ر پڕۆژه په‌یڕه‌وی پێدانی مۆڵه‌تی خوێندن.
ڕەشنوسی پڕۆژەیاسای وه‌زاره‌تی كاره‌با.
