وەزیری دەرەوەی چین ڕایگەیاند کە ئیدارەکەی دۆناڵد ترەمپ بەرپرسیارە لە زیاترکردنی ناکۆکییەکانی نێوان هەردوو وڵات و داوادەکات پەرە بە پەیوەندییەکانی نێوانیان بدرێت.
وانگ یی، لە لێدوانێکیدا لە کۆڕبەندی پەکیندا ڕایگەیاند، “لەبارەی پەیوەندییەکانمان لەگەڵ ئەمریکا لەسەر هەردوولا پێویستە گرنگی بە کاروبارەکانی ناوخۆی وڵاتەکانمان بدین هاوشانی کارکردن و هەماهەنگیی پێکەوە لەپێناو بەرژەوەندی هاوبەشی سەرجەم مرۆڤایەتی”.
وەزیری دەرەوەی چین وتی، هۆکاری زیادبوونی ناکۆکییەکانی پێشووی نێوان ئەمریکا و چین دەگەڕێتەوە بۆ ئەو ڕێکارانەی ئیدارەی پێشووی ئەمریکا جێبەجێیکرد بۆ پەراوێزخستن و دابڕینی چین.
باسیلەوەکرد کە دیموکراتەکان پێویستە سوربن لەسەر مامەڵەکردن لەگەڵ سەرجەم وڵاتاندا و ڕاشیگەیاند، “وڵاتەکەمان هەمیشە پەیوەستبووە بە پاراستنی مافەکانی مرۆڤ”.
جەختیشیکردەوە، “ئێمە هەوڵی گفتوگۆ و لێکتێگەیشتن دەدەین و ڕوبەڕووبوونەوە و ناکۆکیمان ناوێت”.
ئاماژەی بەوەشکرد، چین هەموو کاتێک داوای هەماهەنگی و کاری پێکەوەیی دەکات لەسەر بنەمای براوە – براوە.
ڕایگەیاند کە چین هیچ کاتێک هەوڵی نەداوە دەستوەردان بکات لەکاروباری ناوخۆی ئەمریکا و نامانەوێت تەحەدای ئەمریکا بکەین یان پێگەکەیان بگرین و جێگەی ئەوان بگرینەوە.
