بەهۆی زۆری پێکانەکانەوە، زینەدین زێدانی فەرەنسی ڕاهێنەری یانەی ڕیاڵ مەدرید بە پلانی سێ بەرگریکارەوە ڕوبەڕوی یانەی خیتافی بووەوە، لە یەک کاتدا بەشداری بە مارسێلۆ و مێندی کرد، کە ئەوەش دووبارەبوونەوەی پلانەکانی خواندی ڕامۆسی ڕاهێنەری پێشووی یانەکەیە.
زێدان بە پلانی (3-5-2) ڕوبەڕوی خیتافی بووەتەوە و مارسێلۆی لە پێگەی ناوەندی بەرگری چەپ و فێرلاند مێندی لە پێگەی بەرگری باڵی چەپ بەکارخستووە، یاریزانەکەی سیلیساو باشترین ئاستی پێشکەشکرد بە ئاڕاستەکردنی 74 گواستنەوە کە 63ی دروست بووە و 40ی لەناو ناوچەی ڕکابەردا ئەنجامداوە، لەوەش گرنگتر، توانیویەتی گۆڵێک بۆ مێندی هاوکاری بڕەخسێنێت.
لە خولەکی 86 بەهۆی پێکانەوە مارسێلۆ یاریگای بەجێهێشت و لەم وەرزەدا بەهۆی دابەزینی ئاستی جەستەییەوە نەیتوانیوە بەشداری بەردەوام بکات، تەنها 752 خولەک یاریکردووە بەرانبەر 2027 خولەک بۆ مێندی.
ڕۆژنامەی ئاسی ئیسپانی لەم بارەیەوە نوسیویەتی، لە وەرزی 2008/2009 ڕاهێنەری ئیسپانی، خواندی ڕامۆس بە هەمان پلان بەشداری بە مارسێلۆ لە ناوەندی بەرگری و گابریال هاینزە لە باڵی بەرگری چەپدا کردووە.
لەو ماوەیەدا شاهانەییەکان 17 بردنەوە و یەکسانبوونێکیان تۆمارکردووە، کە ئەوەش یەکێکە لە باشترین ئەنجامەکان، بەڵام کۆتایی ئەم پلانە بێزارکەربووە، لە یاریگای خۆیاندا ڕێکەوتی 20ی کانونی یەکەمی 2008 تاوەکو 26ی نیسان سەرکەوتووبوون و لە کۆتا یارییدا بەرانبەر بەرشلۆنە (6-2) دۆڕاندنیان تۆمارکردووە.
