سەرۆکی پەرلەمانی ئێران ڕایدەگەیەنێت، لە شەڕێکی وجودیداین لەگەڵ ئەمریکا و ئەوان ئامانجیان ڕووخاندنی دەسەڵاتەکەمانە.
محەمەد باقر قالیباف، سەرۆکی پەرلەمانی ئێران ڕایگەیاند، ئێمە هەرگیز پێشوازیمان لە شەڕ نەکردووە و هەرگیز ناشیکەین، بەڵام دەبێت ئامادەکاری بۆ شەڕ بکەین و تا مردن بە هێزەوە بوەستین.
وتیشی، ڕێبازی ئێمە بۆ شەڕ یان دانوستان، دەبێت لەسەر بنەمای بەرژەوەندیی نەتەوەیی و ئاسایش بێت و ڕاستەقینەش بێت. پێمان وایە یاداشتی لێکتێگەیشتن بێ مانایە، ئەگەر بڕگەکانی لە کاردا نەبن و جێبەجێ نەکرێن.
دووپاتیشیکردەوە، “وەک هەمیشە، هێزە چەکدارەکانمان ئازادییەکی تەواویان هەیە بۆ چالاکی، بەمەبەستی ڕووبەڕووبوونەوەی هەر دەستدرێژییەک”.
