هاتوچۆی هەڵەبجە، لەبارەی بەکارهێنانی پاسکیل و سکۆتەری کارەبایی لەلایەن منداڵانەوە، هۆشداری بە دایکان و باکان دەدات.
بەڕێوەبەرایەتیی هاتوچۆی پارێزگای هەڵەبجە، ڕایگەیاند، لەگەڵ بڵاوبوونەوەی بەکارهێنانی پاسکیل و سکۆتەری کارەبایی (شەحن) لە شارەکەماندا، تێبینیی ئەوەمان کردووە کە مێردمنداڵان و هەرزەکاران بەبێ ڕەچاوکردنی ڕێنماییەکانی سەلامەتی، ئەم ئامێرانە لەسەر شەقامە سەرەکییەکان و شوێنە قەرەباڵغەکان بەکاردەهێنن، کە ئەمەش مەترسییەکی گەورەی بۆ سەر گیانی خۆیان و شۆفێران دروستکردووە.
دەشڵێت، وێڕای ئەوەی هۆشیاری دەدەینە بەکارهێنەران، داوا لە دایک و باوکان دەکەین:
1- چاودێریی ورد: تکایە ڕێگە بە منداڵەکانتان مەدەن پاسکیل و سکۆتەری کارەبایی لەسەر شەقامە سەرەکییەکان بەکاربهێنن، ئەم ئامێرانە بۆ شەقامی خێرا و قەرەباڵغ دروست نەکراون و مەترسیی ڕووداوی نەخوازراویان زۆرە.
2- بەرپرسیارێتیی خێزانی: پاراستنی سەلامەتیی منداڵەکانتان بەرپرسیارێتییەکی هاوبەشە، پێش کڕینی هەر ئامێرێکی لەم جۆرە، دڵنیابن لەوەی منداڵەکەتان یاساکانی هاتوچۆ دەزانێت و تەنیا لە شوێنی گونجاو و دوور لە شەقامی سەرەکی بەکاریدەهێنێت.
3- پاراستنی هاوڵاتییان: هاتوچۆی هەڵەبجە بە جددی کار بۆ ڕێگریکردن لە هەر دیاردەیەک دەکات کە ببێتە هۆی دروستبوونی کارەسات، تکایە پێش ئەوەی ناچاربین ڕێکاری توندتر بگرینەبەر، ئەرکی نیشتمانی و کۆمەڵایەتیی خۆتان جێبەجێبکەن و ڕێگە مەدەن منداڵەکانتان ئەم ئامێرانە بهێننە سەر شەقامە گشتییەکان.
