وتەبێژی پۆلیسی گەرمیان، ڕایگەیاند، کەسێک سکاڵای لە سەر سێ هاوڵاتی تۆمارکرد بە گومانی ئەوەی جادویان لێکردبێت.
سۆران محەمەد، وتەبێژی پۆلیسی گەرمیان، ڕایگەیاند، هاوڵاتییەک لە بنکەی پۆلیسی شــەهیدانی قەزای کەلار سکاڵایەکی تۆمارکرد لە سەرسێ کەس بە گومانی ئەوەی جادوی لێکرابێت، ئەوەش پشتبەستن بەوەی لە شوێنی ڕووداوەکەدا لەڕێگەی کامێرای چاودێرییەوە دەرکەوتووە کە ئاویان ڕشتووە بە دیوار و بەردەم دەرگای ماڵی سکاڵاکار و ماڵی باوکی.
دەشڵێت، لەسەر ئەم بنەمایە و بە بڕیاری دادوەری لێکۆڵینەوەی کەلار و بەپێی ماددەی (430) لە یاسای سزادان ئەو سێ کەسە دۆسییەیان بۆکراوەتەوە و پاش تەواوبوونی ڕێکارەسەرەتاییەکانی لێکۆڵینەوە، بە کەفالەت ئازادکراون.
ئاماژە بەوەشدەکات، ئێستا پۆلیس بەردەوامە لە لێکۆڵینەوە لە دۆسیەکە و سەرقاڵی کۆکردنەوەی بەڵگە و بەدەستهێنانی شایەتەکانە بۆ دڵنیابوون لە ڕاستی و دروستیی ڕووداوەکە و تەواوکردنی ڕێکارە یاساییەکان.
