بەڕێوەبەرایەتیی هاتوچۆی پارێزگای هەڵەبجە ڕایگەیاند، ئاگاداری سەرجەم شۆفێرانی ئۆتۆمبێلە بێسەرەتاکان (تەنانەت ئەوانەشی کە کۆدیان بۆ کراوە) دەکەینەوە، کە بە هیچ شێوەیەک لەناو سەنتەری بازاڕ و شوێنە گشتییەکاندا نەوەستن.
ئاماژەی بەوەشدا، نابێت ماتۆڕسکیلەکان بەهیچ بیانوو یاخود کارێکی تایبەت بێنە ناو سەنتەری شارەوە.
ڕوونیشیکردەوە، بەهۆی ئەوەی ئۆتۆمبێلە بێسەرەتاکان و ماتۆڕسکیلەکان تۆمارنەکراون و سیستمی سزای دارای (غەرامە) نایانگرێتەوە، لە کاتی ئەنجامدانی هەر سەرپێچییەکدا ڕاستەوخۆ ڕێکاری توندی یاساییان بەرامبەر دەگیرێتەبەر و دەستبەجێ لەلایەن تیم و مەفرەزەکانی هاتوچۆ و هێزە ئەمنییەکانەوە ڕەوانەی گەراجی دەستبەسەرداگرتن دەکرێن.
هاتوچۆی هەڵەبجە دەشڵێت، ڕێنماییەکان بەمەبەستی پاراستنی ڕێکخستنی شار، کەمکردنەوەی لۆد و قەرەباڵغی و بەخشینی سیمایەکی جوان و شارستانی بە سەنتەری شار و شوێنە گەشتیارییەکان دراوە و داوا لە شۆفێران دەکەین پابەندبن.
