لە دیدارێكیدا لەگەڵ نادیە موراد، سەرۆككۆماری عێراق جەختیكردەوە لەوەی، هەوڵەكان چڕ بكرێنەوە بەمەبەستی دۆزینەوەی چارەنوسی كچان و ژنانی ئێزدی ڕفێندراو لەلایەن داعشەوە.
نوسینگەی سەرۆكایەتیی كۆماری عێراق ئاشكرایكردووە، بەرهەم ساڵح، سەرۆككۆماری عێراق ئەمڕۆ دووشەممە 1ی شوبات لە كۆشكی سەلام لە بەغداد پێشوازیكرد لە نادیە موراد، چالاكوانی ئێزدی و ڕزگاربووی دەستی داعش.
ئەوەش خراوەتەڕوو، “لە دیدارەکەدا سەرۆككۆمار دووپاتیکردەوە كە بە هەموو هێز و توانایەوە كاردەكات بۆ گەڕانەوەی ئێزدییەكان و هەموو ئاوارە و دەربەدەرەکان بۆ زێدی خۆیان و دابینكردنی ژیانێكی شایستە و خۆشگوزەران”.
ھەروەھا بەرهەم ساڵح جەختیكردووەتەوە، “پێویستە سەرجەم بەربەستە سیاسی و كارگێڕییەكانی بەردەم پرۆسەی ئاسایی کردنەوەی دۆخی ئەو ناوچانە لاببرێن، بەتایبەتی دۆخی ئیدارەی شەنگال دووبارە ڕێكبخرێتەوە و ئاسایش و سەقامگیری تێدا پارێزراو بێت و خزمەتگوزارییە مادی و مەعنەوەییەكانیش بۆ دانیشتووانەكەی بەردەست بخرێت بەجۆرێک شایستەی قوربانیدانی خەڵکەکەی بێت”.
هەروەها هیواشی خواستووە، “یاسای کچان و ژنانی ئێزدییە ڕزگاربووەكان بە زووترین كات پەسەند بكرێت، ھاوکات سەرجەم چین و توێژە زیان لێكەوتووەكانی دیكەش بگرێتەوە، ئاماژەشی بە گرنگی ئەو كارە دڵسۆز و ماندونەناسانە كرد كە لەلایەن دەزگا ئەمنی و هەواڵگرییەكان بە هەماهەنگی لەگەڵ لایەنە پەیوەندیدارەکان و كۆمەڵگەی نێودەوڵەتی ئەنجامدراون بەمەبەستی چڕكردنەوەی هەوڵ و كۆششەكان بۆ سۆراغكردنی چارەنوسی ژن و كچە ڕفێندراو و شوێنبزركراوەكانی ئێزدی و ئازادكردنیان”.
“لای خۆشیەوە نادیە موراد دووپاتیکردەوە کە لە هەوڵەکانی بەردەوام دەبێت بۆ خزمەتكردنی زیاتری ئێزدییەكان و چین و توێژە زیان لێكەوتووەكانی دیكەی قوربانیانی دەستی تیرۆر و تیرۆرستان”، وەك لە ڕاگەیەندراوی دیدارەكەدا هاتبوو.
