شارەوانیی سلێمانی ئاگادارییەکی بڵاوکردووەتەوە و تێیدا هاتووە کە کۆمەڵێک کاندید دوور لە رێنماییەکانی شارەوانی پۆستەرەکانیان هەڵواسیوە و زیانیان بە باخچە و بلوارەکان گەیاندووە.
سەرۆکایەتیی شارەوانیی سلێمانی راگەیەندراوێکی بڵاوکردەوە و تێیدا هاتووە، “پێشتر بەنووسراوی رەسمیی ئاگاداری سەرجەم لایەنە پەیوەندیدارەکان و کۆمسیۆنی باڵای هەڵبژاردنەکانمان کردووە کە پێویستە دانانی پۆستەر و ستاندەکان بەپێ رێنماییەکان دابنرێت و دووربێت لە زیانگەیاندن بە سەوزایی، بلوارەکان، عەمودەکان، کێبڵی کارەبا و ئاودێرییەکان”.
ئاماژەی بەوەشکرد، “بەڵام بەداخەوە کۆمەڵێک پۆستەر و ستاند لەناو بلوارەکانی شەقامی مەلیک مەحمود و تاسڵوجە –سلێمانی دانراون و تێبینیکراوە کە سەرجەمیان دوورە لە رێنماییەکانمان، هەروەها هۆکارێکە بۆ زیانگەیاندن بە بلوارەکان، باخچەکان، سەوزایی، وشکبوونیان و ناتوانرێت رۆژانە کاری ئاودێریکردنیان بۆ ئەنجامبدرێت”.
داوایەکیش ئاڕاستەی لایەنەکان و کاندیدەکان دەکات، کە لەماوەی دوو رۆژدا هەستن بە لابردنی ئەو پۆستەر و ستاندانەی کە بەپێچەوانەی رێنماییەکان دانراون.
