وەزارەتی ناوخۆی عێراق بڵاویکردەوە، بە هاوکاریی بەڕێوەبەرایەتیی بەرەنگاربوونەوەی ماددە هۆشـ.ـبەرەکانی هەرێم دوو بازرگانی نێودەوڵەتی لەناو خاکی عەرەبستانی سعودی دەستگیرکراون و دەستیش بەسەر بڕێکی زۆر لە ماددەی هۆشبەردا گیراوە.
عەباس بەهادلی وتەبێژی وەزارەتی ناوخۆی عێراق رایگەیاند، لە رێگای هەوڵە بەردەوامەكانی بەرەنگاربوونەوەی ماددە هۆشبەرەكانی هەرێمی كوردستان كە بەردەوامبوون لە كۆكردنەوەی زانیاری و بەدواداچوونی ورد، بە هەماهەنگی لەگەڵ بەڕێوەبەرایەتیی گشتی بەرەنگاربوونەوەی ماددە هۆشبەرەكانی سعودییە، توانیان 142 كیلۆگرام ماددەی هۆشبەری شل لە جۆری كریستاڵ کە لەناو ئۆتۆمبێلدا شاردرابوونەوە دەستیانبەسەردا بگیرێت.
ئاشکراشیکرد، هاوکات توانرا دوو گەورە بازرگانیی نێودەوڵەتیی ماددە هۆشبەرەکان لە شاری مەدینە دەستگیربکرێن.
جەختیشیکردەوە، “ئەمە یەكەم ئۆپەراسیۆن نییە، پێشتریش ئۆپەراسیۆنی هاوشێوە لەگەڵ سعودییە و وڵاتانی دیكەی عەرەبی ئەنجامدراون و دەبێت بە یەكگرتوویی بوەستین بۆ ڕووبەڕووبوونەوەی ماددە هۆشـ.ـبەرەكان”.
