محەمەد شیاع سودانی ئاشكرایکرد، حکومەتی عێراق بەردەوامە لە بونیادنانەوەی ئابوریی عێراق و باوەڕی بەوە هەیە بتوانێت ئابوریی عێراق بەرەوپێشتر ببات، هەروەها لە دوو ساڵی رابردوودا قەبارە و ئاستی وەبەرهێنانی ناوخۆیی و دەرەکی لە عێراق گەیشتووەتە 100 ملیار دۆلار.
محەمەد شیاع سودانی، سەرۆک وەزیرانی عێراق لە ئاهەنگی رۆژی هاوبەشییەکانی نێوان دامەزراوەی دارایی نێودەوڵەتیی و حکومەتی عیراق رایگەیاند، “لە سەرەتاکانی پێکهێنانی ئەم حکومەتەوە، بەردەوام هەوڵدراوە بە راوێژکردن بە شارەزایان، لە چەندین بواری جیاواز، کەرتە جیاوازەکانی عێراق ببرێتەپێش و بەردەوام کار بۆ بەرەوپێشبردنی ئابوریی عێراق کراوە”.
ئەوەشی خستەروو، “حکومەتی عێراق لە هەوڵی بەردەوامدایە گەشەی زیاتر بە کەرتی تایبەت بدات و ژینگەی وەبەرهێنان لە وڵاتدا باشتر بکات، ئەمەش وایکردووە قەبارە و ئاستی وەبەرهێنانی وەبەرهێنەرە جیهانی و ناوخۆییەکان لە دوو ساڵی رابردوودا بگاتە 100 ملیار دۆلار”.
وتیشی، کەرتی تایبەت هاوبەشێکی کاریگەرە لە رەخساندنی دەرفەتی هەلی کار، هەروەها توانیویانە سەرمایەی بیانی رابکێشین و هانی دامەزراوە نێودەوڵەتییەکانی دیکە بدەن وەبەرهێنان لە عێراق بکەن.
