عەلی نزار، بەڕێوەبەری کۆمپانیای سۆمۆ لە لێدوانێکدا ئاشکرایکرد، حکومەتی هەرێم خواستی ئەوەی هەیە دەستبکاتەوە بە هەناردەی نەوت و تورکیاش رەزامەند بووە بەوەی لە رێگەی بەندەری جەیهانەوە نەوتی کوردستان هەناردەبکرێت.
ئاماژەی بەوەشکرد، گفتوگۆکانی رابردوو ئەرێنیی بوون و لێکتێگەیشتن لەنێوان وەزارەتی سامانە سروشتییەکانی هەرێم، وەزارەتی نەوتی عێراق و کۆمپانیای سۆمۆ دروستبووە، بۆ دەستکردن بە هەناردەکردنەوەی نەوتی هەرێم.
ئەوەشی خستەڕوو، بەپێی یاسای بودجەی عێراق، حکومەتی هەرێم پێویستە رۆژانە 400 هەزار بەرمیل نەوت رادەستبکات، بەڵام بەرهەمی نەوتی هەرێم ناگاتە رێژەی پێویست، بۆیە ئەنجومەنی وەزیرانی عێراق ئەو رێژەیەی بۆ 230 هەزار بەرمیل نەوتی رۆژانە کەمکردووەتەوە؛ تەنانەت ئەگەر لەو رێژەیەش کەمتر بێت، هێشتاش مامەڵەی پێوەدەکرێت.
لەبارەی کێشەی کۆمپانیا نەوتییەکانەوە، عەلی نزار وتی، کۆمپانیا نەوتییەکان داوای گرەنتی دەکەن تاوەکو بتوانن کارەکانیان بەباشی ئەنجامبدەن؛ تاوەکو زووتریش ئەو کێشانە چارەسەربکرێن، لە سوودی هەرێمی کوردستانە.
