وتەبێژی وەزارەتی خوێندنی باڵا و توێژینەوەی زانستی رایگەیاند، بۆ ئەمساڵی خوێندن داشکاندنی 45% لە کرێی خوێندنی زانکۆ و پەیمانگەکان دەکرێت.
عەباس ئەکرەم وتەبێژی وەزارەتی خوێندنی باڵا و توێژینەوەی زانستی بە تۆڕی میدیایی ئێستای راگەیاند، لە کۆبوونەوەی ئەنجومەنی وەزارەت بڕیاردرا داشکاندن لە کرێی خوێندنی زانکۆ و پەیمانگەکانی هەرێم بە حکومی و ناحکومییەوە بکرێت.
ئاماژەی بەوەشکرد، داشکاندنەکە بە شێوەیەکە 45% لە کرێی خوێندنی پارالێل زانکۆ و پەیمانگە حکومییەکان، لە زانکۆ و پەیمانگە ئەهلییەکانیش لەنێوان 10%-25% دەبێت بەپێی ئەنجامی ریزبەندیی نیشتمانیی زانکۆکانی هەرێم.
ئاشکراشیکرد، هاوشێوەی ساڵانی رابردوو هیچ جیاوازییەک لەنێوان کرێی خوێندنی پارالێل لە بەیانیان و ئێواران ناکرێت، لێخۆشبوون بۆ کرێی خوێندنی منداڵان و کەسوکاری شەهیدانیش بەردەوامدەبێت.
جەختیشیکردەوە، بڕیارەکە تا کۆتایی کابینەی نۆیەمی حکومەتی هەرێم بەردەوامدەبێت.
