ئەندامێکی ئەنجومەنی نوێنەرانی عێراق رایگەیاند، “بە هەوڵی سەرۆک بافڵ رێککەوتنی نێوان هەرێم و بەغداد پەسەندکرا”.
د. نەرمین مەعروف، ئەندامی ئەنجومەنی نوێنەرانی عێراق رایگەیاند، بە هەوڵ و کۆششی سەرۆک بافڵ تاڵەبانی ئەمڕۆ لە کۆبوونەوەی ئەنجومەنی وەزیران رێککەوتنی نێوان هەردوو حکومەتی هەرێم و فیدراڵ لەبارەی مووچە و هەناردەکردنەوەی نەوتی هەرێم پەسەندکرا.
دەشڵیت، بەپێی رێککەوتنەکە لەچوارچێوەی یاسای بودجەی سێ ساڵەی فیدراڵ و هەمواری یاساکە هەرێمی کوردستان رۆژانە 230 هەزار بەرمیل نەوت دەداتە کۆمپانیای سۆمۆ بەمەبەستی هەناردەکردن، وە لەچوارچێوەی یاسای ئیدارەی دارایی مانگانە 120 ملیار داهاتی نانەوتی دەداتە خەزێنەی حکومەتی فیدراڵ، لە بەرامبەردا حکومەتی فیدراڵ مووچەی مووچەخۆرانی هەرێم خەرجدەکات بەمەرجێک لە چەند مانگی داهاتوو پرۆسەی بەبانکیکردنی مووچە لە هەرێم تەواوبکرێت.
باس لەوەشدەکات، لە دەستپێکی جێبەجێکردنی ئەم رێککەوتنە حکومەتی فیدراڵ رەزامەندیدا بە خەرجکردنی مووچەی مانگی ئایاری موچەخۆرانی هەرێم، لە چوارچێوەی ئەرکی پەرلەمانی چاودێردەبین بۆ پابەندبوونی هەردوولا بە جێبەجێکردنی رێککەوتنەکە.
