رێکخراوی ئۆکسفام، کە تایبەتە بە بەرەنگاربوونەوەی نایەکسانی ئاشکرایکردووە، سامانی کۆی چوار لە دەوڵەمەندترین ملیاردێرەکانی ئەفریقا لە سەروەت و سامانی نیوەی دانیشتووانی کیشوەرەکە زیاترە.
رێکخراوەکە لە راپۆرتێکدا بە ناوی “قەیرانی نایەکسانیی ئەفریقا” رایگەیاندووە، سامانی ئەم چوار کەسە بە 57.4 ملیار دۆلار مەزەندەدەکرێت.
ئەو چوار ملیاردێرە بریتین لەمانەی خوارەوە:
– ئەلیکۆ دانگۆتێ (نەیجیریا)
– یۆهان روپێرت (ئەفریقای باشوور)
– نیکی ئۆپنهایمەر (ئەفریقای باشوور)
– نەسیف سەویریس (میسر)
سەرجەم ئەو ملیاردێرانە، بازرگانی دیارن لە کیشوەری ئەفریقادا و ئەو سامانەی هەیانە، لە سامانی نیوەی دانیشتووانی ئەو کیشوەرە زیاترە؛ رێکخراوی ئۆکسفام-یش، ئەم بابەتە بە “نایەکسانی و مافخواردن” لەقەڵەمدەدات.
ئەفریقا یەکێکە لەو کیشوەرانەی جیهان کە بەرزیترین رێژەی هەژاریی تێدایە، ئۆکسفام دەڵێت، “سەرەڕای خراپتربوونی باری دارایی دانیشتووان و فراوانبوونی نایەکسانی لەو کیشوەرەدا، حکومەتەکانی وڵاتانی ئەفریقا هەوڵنادەن بۆ کەمکردنەوەی ئەو جیاوازی و نایەکسانییە”.
