تەندروستیى هەرێم لە روونکردنەوەیەکدا تۆمارکردنى دوو حاڵەتى تووشبوون بە تاى خوێنبەربوون و گیانلەدەستدانى یەکەم حاڵەت رادەگەیەنێت.
وەزارەتى تەندروستیی هەرێم رایگەیاند، دوای بوونی دوو حاڵەتی گومانلێکراوی نەخۆشیی تای خوێنبەربوون لە سنووری پارێزگای دهۆک. دوای هاتنیان بۆ نەخۆشخانە و بەدواداچوون و پشکنین بۆ گومانلێکراوان لەماوەی دوو رۆژی رابردوودا، بەداخەوە حاڵەتێکیان دوای دڵنیابوونەوە و پشتڕاستکردنەوەی پشکنینەکان وەکو دووەم حاڵەتی تای خوێنبەربوون لە هەرێمی کوردستان تۆمارکرا.
دەشڵێت، تووشبووەکە “هاوڵاتیەکی (شیلادزێ)یە لە قەزای ئامێدی، تەمەنی (45) ساڵە و پیشەی ژنى ماڵە و خاوەن و بەرکەوتەی ئاژەڵن”.
دوای گەیاندنی بۆ نەخۆشخانەیەکی شاری دهۆک بەهۆی بوونی نیشانەکانی خوێنبەربوون و چەندین رێکاری چارەسەری پزیشکی، بەهۆی خراپی دۆخی تەندروستی وەکو یەکەمین حالەتی تای خوێنبەربوون گیانیلەدەستدا، تەندروستیی هەرێم وادەڵێت.
داواش لە هاوڵاتیان دەکات رێنماییەکانی وەزارەتی تەندروستی جێبەجێ بکەن و، لەکاتی بوونی گومان و نیشانەکانی نەخۆشی لەسەر ئاژەڵ، پێویستە تیمەکانی ڤێترنەری ئاگاداربکەنەوە. یان هاوڵاتیانی بەرکەوتووانی بەخێوکردنی ئاژەڵ یان بەرهەمەکانی ئاژەڵ لەکاتی بوونی هەر نیشانەیەکی ناتەندروست، بەخێرایی و بێ دواکەوتن سەردانی نەخۆشخانەکان بکەن.
