وتەبێژی وەزارەتی ئەوقاف و كاروباری ئایینیی هەرێم روونكردنەوە لەبارەی وادەی دەستپێكردنەوەی گەشتی عومرە دەدات و جەختیشدەكاتەوە نرخی گەشتی عومرە بەپێی شێوازی خزمەتگوزارییەكان دەگۆڕدرێت، بەڵام پێشبینیدەكرێت نرخەكەی لە نێوان 850 دۆلار بۆ هەزار و 100 دۆلاردا بێت.
نەبەز ئیسماعیل وتەبێژی وەزارەتی ئەوقاف و كاروباری ئایینیی هەرێم لە لێدوانێكدا بە تۆڕی میدیایی ئێستای راگەیاند، دوای كۆتاییهاتنی وەرزی حەجییان و گەڕاندنەوەی تەواوی حاجییان كە تا 11ی ئەم مانگە دەبێت تەواوی حاجییان بگەڕێنەوە، گەشتی عومرە دەستپێدەكاتەوە.
ئاشكراشیكرد، تائێستا بڕیاری كۆتایی لەبارەی نرخی گەشتی عومرە نەدراوە، بەڵام بەپێی شێوازی پێشكەشكردنی خزمەتگوزارییەكان دەگۆڕدرێت و پێشبینیدەكرێت هاوشێوەی ساڵانی دیكە بێت و نرخەكەی لە نێوان 850 دۆلار بۆ هەزار و 100 دۆلاردا بێت و گۆڕانكاری لە نرخەكەشی پەیوەستە بە شێوازی پێشكەشكردنی خزمەتگوزارییەكان بە عومرەكارانەوە.
