فەرماندەیەكی گشتیی هاوپەیمانان دڵنیایی بە وەزیری پێشمەرگە دەدات دەربارەی بەردەوامبوونی هاوکارییە دارایی و سەربازییەکانی هاوپەیمانان بۆ هێزی پێشمەرگە.
ئەمڕۆ شۆڕش ئیسماعیل، وەزیری پێشمەرگە پێشوازی لە جەنەڕاڵ هام، فەرماندەی گشتیی راوێژکارانی سەربازیی هاوپەیمانان لە عێراق و شاندێکی سەربازیی یاوەری کرد.
بەپێی راگەیەندراوێكی وەزارەتەكە، وەزیری پێشمەرگە لەبارەی چاکسازییەکان رایگەیاند، “چاکسازی و پرۆسەی یەکخستنەوە و رێکخستنەوەی هێزی پێشمەرگە بەردەوامە و هەموو هێزی پێشمەرگە لە چوارچێوەی فیرقەکاندا جێگیردەبن، بەمەش قۆناغێکی نوێی هێزێکی یەکگرتووی نیشتیمانی دێتە ئاراوە”.
لەبارەی بنیاتنانی دوو ناوچەی سەرکردایەتی، شۆڕش ئیسماعیل وتی، “هەوڵەکانمان بەردەوامن و دەمانەوێت بەم نزیکانە هەردوو ناوچەی سەرکردایەتی دەستبەکاربن و فیرقەکانیش لە چوارچێوەی ناوچە سەربازییەکاندا جێگیربکرێن”.
لای خۆیەوە جەنەڕال هام، دڵخۆشیی خۆی دەڕبری لە بەرامبەر بەرەوپێشچوونی زیاتری چاکسازی لە وەزارەتی پێشمەرگە هەروەها لە قسەکانیدا وەزیری پێشمەرگەی دڵنیاکردەوە کە هاوکارییە دارایی و سەربازییەکانی هاوپەیمانان و ئەمریکا بۆ هێزی پێشمەرگەی کوردستان بەردەوام دەبێت.
راشیگەیاند، “ریفۆرمی سەربازی لە وەزارەتی پێشمەرگە هەنگاوی زۆر باشی بڕیوە، دڵنیاین ئیرادەی ئێوە بۆ چاکسازی ڕاستەقینەیە و دەتانەوێت پێشمەرگە ببێت بە هێزێکی نیشتمانی لە ناوچەکەدا، ئێمەش لەم پێناوەدا لەگەڵتان دەبین و پاڵپشتان دەبین”.
