قوباد تاڵەبانی، جێگری سەرۆك وەزیران پێشوازیكرد لە وەفدێكی سەربازیی ئەڵمانیا بە سەرۆكایەتیی كۆلۆنێڵ تۆماس ریتەر، فەرماندەی نوێی هێزەكانی ئەڵمانیا لە هەرێمی كوردستان و لە كۆبوونەوەی نێوانیاندا پرسی ریفۆرم لە وەزارەتی پێشمەرگە و چەند پرسێكی دیكەی جێی بایەخی هەردوولا تاوتوێكران.
لە كۆبوونەوەكەدا كە رۆژی سێشەممە بە ئامادەبوونی هەر یەكە لە شۆڕش ئیسماعیل، وەزیری پێشمەرگە و لیوا بەختیار، ئەمینداری گشتیی وەزارەتی پێشمەرگە بەڕێوەچوو، قوباد تاڵەبانی پیرۆزبایی لە كۆلۆنێڵ تۆماس ریتەر كرد بەبۆنەی دەستبەكاربوونی وەك فەرماندەی نوێی هێزەكانی ئەڵمانیا لە هەرێمی كوردستان و هیوای سەركەوتنی بۆ خواست لە ئەركەكەیدا وئامادەی خۆی دەربڕی بۆ هەموو جۆرە هاوكاری و پاڵپشتییەك بۆ هێزەكانی ئەڵمانیا لە هەرێمی كوردستان.
دواتر جێگری سەرۆك وەزیران سوپاسی حكومەت و پەرلەمانی ئەڵمانیای كرد كە رەزامەندییان دەربڕیوە بۆ درێژكردنەوەی مانەوەی هێزەكانی ئەو وڵاتە لە هەرێمی كوردستان و عێراق وهەروەها ستایشی ئەڵمانیای كرد كە هەمیشە هاوكار و پشتیوانی هەرێمی كوردستان بووە.
لە تەوەرێكی دیكەی كۆبوونەوەكەدا گفتوگۆكرا لەبارەی ئاستەنگەكانی بەردەم پرۆسەی ریفۆرم لە وەزارەتی پێشمەرگە و لەمبارەیەشەوە قوباد تاڵەبانی جەختیلەوە كردەوە كە پێویستە حكومەتی داهاتووش پشتیوانی پرۆسەی ریفۆرم بكات لە هێزەكانی پێشمەرگەدا.
