بەڕێوەبەری کەشناسیی سلێمانی رایگەیاند، پێشبینیدەکرێت لە سەرەتای هەفتەی داهاتوو شەپۆلێکی بارانبارین هەرێم بگرێتەوە.
ئاسۆ کەمال بەڕێوەبەری کەشناسیی سلێمانی بە تۆڕی میدیایی ئێستای راگەیاند، ماوەی چەند رۆژێکە لە هەندێک شوێنەوە زانیاریی ئەوە بڵاودەکرێتەوە کە لە ئەمڕۆوە شەپۆلێکی بارانبارین هەرێم دەگرێتەوە، لە راستیدا لەم کاتەدا کە وەرزی پایزە قورسە بتوانرێت پێشبینی وردی گۆڕانی کەشوهەوا بکەین، چونکە رەگەزەکانی کەش بە خێرایی دەگۆڕێن.
وتیشی، ئێمە ماوەی زیاتر لە هەفتەیەکە بە وردی چاودێریی گۆڕانی کەشوهەوا دەکەین، بەپێی پێشبینییەکان ئەمڕۆ و سبەینێ لە زۆرینەی ناوچەکانی هەرێم ئاسمان لەنێوان ساماڵ و نیمچە هەور دەبێت و لە هەندێک ناوچە دەگۆڕێت بۆ هەوری تەواو.
باسیلەوەشکرد، لە رۆژانی سەرەتای هەفتە شەپۆلێکی بارانبارین هەرێم دەگرێتەوە، بەڵام بەهۆی ئەوەی رەگەزەکانی کەشوهەوا بە خێرایی دەگۆڕێن، لە کاتەکانی دواتردا دەتوانین بە وردی زانیاریی زیاتر لەبارەی ئەو شەپۆلە بخەینەڕوو.
