بەمەبەستی پۆلێنکردنی ئەو سکاڵایانەی لە رۆژی هەڵبژاردنی پەرلەمانی کوردستان تۆمارکراون کۆمسیۆنی باڵای هەڵبژاردنەکان سێ لیژنەی پێکهێنا.
جومانە غەلای وتەبێژی کۆمسیۆنی باڵای سەربەخۆی هەڵبژاردنەکان رایگەیاند، سێ لیژنەی تایبەتمەند لە کەسانی یاسایی و شارەزای بواری هەڵبژاردن و ئەندامانی ئەنجومەنی کۆمسیاران پێکهێنراوە بە مەبەستی پۆلێنکردنی ئەو سکاڵایانەی لە رۆژی هەڵبژاردنی پەرلەمانی کوردستان تۆمارکراون.
ئاشکراشیکرد، جۆری سکاڵاکان بۆ رەنگی زەرد و سەوز و سوور پۆلێنکراون، ئەو سکاڵایانەی رەنگیان سەوز و زەردە کاریگەرییان لەسەر ئەنجامی هەڵبژاردنەکان نابێت، بەڵام سکاڵای سوور پێویستە لەلایەن ئەنجومەنی کۆمسیارانەوە بڕیاری لەبارەوەبدرێت بۆی هەیە کاریگەری لەسەر ئەنجامی هەڵبژاردنەکان هەبێت.
لە رۆژی دەنگدانی تایبەت زیاتر لە 70 سکاڵا و لە رۆژی دەنگدانی گشتیی 124 سکاڵا لەلایەن لایەن و رێکخراوەکان تۆمارکراوە.
