لەگەڵ کردنەوەی بازاڕەکانی دراو لە شارەکانی هەرێمی کوردستان، بەیانی ئەمڕۆ 100 دۆلاری ئەمریکی بەرامبەر بە 153 هەزار و 250 دینار مامەڵەی پێوە دەکرێت و نرخی زێڕیش لە بەرزترین ئاستی مێژوویی خۆیدایە.
نزیکەی مانگێکە بەهای دۆلار لەبازاڕەکانی هەرێمی کوردستان لەسەروو 150 هەزار دینارەوە مامەڵەی پێوەدەکرێت، کە ئەوەش بەهایەکی بەرزە و جیاوازییەکی زۆری هەیە لەگەڵ نرخی رەسمیی دۆلار کە 132 هەزار دینارە لە بانکی ناوەندنی.
هاوکات، لە بازاڕە جیهانییەکانی زێڕ، نرخی ئۆنسەیەک زێڕ بەرزبوونەوەی بەرچاوی بەخۆیەوە بینی و گەیشتە 2721 دۆلار و کیلۆیەکی کانزاکەش گەیشتە 87 هەزار و 495 دۆلار.
بەرزبوونەوەی نرخی زێڕ لەماوەی کەمتر لە ساڵێکدا، لە 1ی 1ی 2024 وە تاوەکو ئەمڕۆ 19ی 10ی 2024، نرخی ئۆنسەیەک لە 1984 دۆلارەوەبۆ 2721 دۆلار بەرزبووەتەوە و بەو جۆرەش 747 دۆلار بەرزبوونەوەی بەخۆیەوە بینیووە.
جێگەی ئاماژەیە، لە بازاڕەکانی هەرێمی کوردستانیش بەرزبوونەوەی زۆری بەخۆیەوە بینووە، بە جۆرێک نرخی زێڕی عەیاری 21 گەیشتووەتە 598 هەزار دینار.
