لە كۆبوونەوەكەدا قوباد تاڵەبانی ئاماژەی بەوەدا كە هیچ هێزێكی سیاسی هێندەی یەكێتی شەهید و قوربانی بۆ كوردستان نەداوە و ئێمەی یەكێتی بۆ هەمیشە شانازی بەو مێژووە پڕ لە سەروەرییەوە دەكەین، بەڵام ئەم مێژووە پڕ شانازییە بۆ ئەوە نییە كە ئێمە پاڵی لێ بدەینەوە، هەربۆیە پڕۆژە و پلانمان هەیە بۆ خزمەتكردنی كۆمەڵانی خەڵكی كوردستان، ئێستا هاوڵاتییان خزمەتگوزارییان دەوێت، حكومڕانی باش و كارایان دەوێت، گەشەسەندنی ئابوری و داواكاری دیكەیان هەیە.
لێپرسراوی مەكتەبی سكرتارییەتی سەرۆك مام جەلال وتیشی، “لە سێ ساڵی رابردوودا یەكێتی بە سەرۆكایەتیی سەرۆك بافڵ جگە لەوەی لە رووی حزبییەوە خۆی رێكخستووەتەوە، لە داواكاری و پێویستییەكانی چینە جۆراوجۆرەكانی كۆمەڵگەشی كۆڵیوەتەوە و بەرنامەی هەیە بۆ جێبەجێكردنی داواكارییەكانیان.
لە بەشێكی دیكەی كۆبوونەوەكەدا روونی كردەوە كە پێشتر گەنجانی كوردستان متمانەیان بە یەكێتی لاواز ببوو، لە هەڵبژاردنەكانی رابردوودا رێژەیەكی گەورەی گەنجان نە ئامادەبوون بەشداریی لە هەڵبژاردندا بكەن و نە دەنگ بە یەكێتیش بدەن، بەڵام یەكێك لە گەورەترین شانازییەكانی سەرۆك بافڵ و ئەم یەكێتییەی ئێستا ئەوەیە تا رادەیەكی باش گەنجانی لەگەڵ یەكێتی ئاشت كردووەتەوە.
قوباد تاڵەبانی باسی لەوەشكرد، نەیارەكانمان هیچ كات وەك ئێستا لە یەكێتی و هێزی یەكێتی نەترساون، بە تایبەتیش كە یەكێتی ئەمجارەیان دەرگای لەسەر هەموو جۆرە ساختەكارییەك داخستووە، هەربۆیە سەركەوتنێكی گەورە چاوەڕێی یەكێتی و دەنگدەرانی یەكێتی دەكات و هەموو لایەكیش دڵنیادەكەینەوە كە ئەم سەركەوتنە گەورەیە بە باشترین شێوە بەكاردەهێنین بۆ راستكردنەوەی رێڕەوی حكومڕانی.
