عیماد ئه‌حمه‌د، بەرپرسی مەکتەبی راگەیاندنی یەکێتیی نیشتمانیی کوردستان لە وتارێکیدا بە ناونیشانی “یەکێتی، بارانی رەحمەت بۆ نەهێشتنی وشکەساڵیی سیاسی و ئابوریی کوردستان”، باسی دۆخی هەرێمی کوردستان لە رووی سیاسی و ئابوری و ئەمنییەوە دەکات و چەند سەرنجێک دەخاتەڕوو.
دەقی وتارەکەی عیماد ئەحمەد:
شاراوە نییە، دۆخی هەرێمی کوردستان تێکچووە و باری ژیانی خەڵک هەموار نییە و نەداریی زاڵبووە و باری ئابوریی هەرێم لاوازە، چونکە دیاردەی گەندەڵی فراوانتر بووەو هەلی کار بۆ گەنجان دەگمەنەو بەشێکیان وڵات بەجێدەهێڵن و روو دەکەنە غەریبستان و کوردستان لە توانای عەقڵ و وزەیان بێبەش دەبێت.
متمانەی خەڵکیش بە بەڕێوەبردنی هەرێم تابڵێی لاواز بووە و دەستوەردانی دەوروبەر لە کاروباری هەرێمدا ترسناکتر بووە، پەیوەندییەکانی هەرێم بە عێراقی فیدراڵەوە وەکو جاران نەماوە، تەرازووی هێز لە نێوانیاندا بەهۆی هەندێک سیاسەتی نادروستەوە، داکشاوە .
بەلای بەغداوە بە جۆرێک ئەگەر بۆیان بکرێت ناوەڕۆکی هەرێم پووچەڵ دەکەنەوە.
ئێستا لەم رۆژگارە سەختەدا، یەکێتیی نیشتمانیی کوردستان دەبێت وەکو بارانی رەحمەت بێت بۆ وشکەساڵیی سیاسی و ئابوری و ئەمنی و قەوارەی هەرێم لە پیلانی دوژمنان بپارێزێت.
بۆ راستکردنەوەی ئەم بارودۆخە نالەبارە، پێویستە یەکێتیی نیشتمانیی کوردستان لە هەوڵی چاکسازیی راستەقینە بەردەوام بێت، بەجۆرێک چۆن لە ناوەڕاستی حەفتاکانی سەدەی رابردوودا هەرەسی بە هەرەس هێنا و شۆڕشی نوێی هەڵگیرساند و ئومێدی دەباراند بە سەرتاسەری کوردستاندا لە رۆژگاری نائومێدیدا، ئاواش دەبێت لەم هەلومەرجەدا شۆڕشی نەرم و چاکسازیی نیشتمانی بەرپا بکات .
بەڵێ ئەرکی ئەخلاقی و کوردایەتیی یەکێتیی نیشتمانیی کوردستان راستکردنەوەی بارودۆخی مەترسیداری ئێستای کوردستانە، بە دۆزینەوەی رێگە و شێوازی خەباتی مەدەنی، بە مەبەستی گۆڕینی سیستمی دەسەڵات بەرەو سەقامگیرکردنی ئاشتی و یەکسانی و حوکمی رەشید.
بۆ جێبەجێکردنی ئەم ئەرکە نیشتمانییە، یەکێتی دەبێت ئەسپی خۆی تاوبدات بە زیادکردنی دەسەڵاتی خۆی لە دامودەزگا سەرەکییەکانی هەرێمی کوردستاندا، ئەویش لە رێگەی پرۆسەی هەڵبژاردن و سندوقەکانی دەنگدانەوە کە بڕیارە لە 20/10/2024 بەڕێوەبچێت.
بۆ پاراستنی قەواری هەرێم و دەربازبوون لەم هەموو قەیرانە مەترسیدارەی کە بەرۆکی خەڵکی کوردستانی گرتووە، یەکێتیی نیشتمانیی کوردستان بەرنامەی سەرەکی و راستەقینەی خۆی داناوە کە ئەمجارە ئەگەر دەنگی زیاتری خەڵک مسۆگەر بکات، بە هەموو توانایەکییەوە دەسەڵات دەگرێتە دەست و بەرنامەی هەڵبژاردنی خۆی جێبەجێ دەکات کە لە بنەڕەتدا لە خزمەتی خەڵکدایە.
بێگومان یەكێتی لە رۆژی دامەزراندنییەوە خەبات لەپێناوی دەسەڵاتی سیاسیدا دەکات بۆ جێبەجێکردنی بەرنامەی نیشتمانی و نەتەوەیی و فەلسەفیی خۆی کە جیاوازیی یەکێتی لەگەڵ لایەنەکانی تری سەر گۆڕەپانی کوردستان، لە بەرنامەکەیدایە، ئەوە جگە لە شێوەی رێکخستنەکەیدا .
ئەمجارە نە نیوە دەسەڵات و نە نیوە ئۆپۆزسیۆن، بەرگەی یەکێتی نابێت، سیاسەتی یەکێتی گۆڕانکاری و جیاکاریی راستەقینەیە لە سیستمی بەڕێوبردن و یاسادانان و دادوەریدا، ئەمەش بە پشتیوانیی خەڵک و رێکخراوەکانی کۆمەڵگەی مەدەنی دەبێت لە رێگەی دەنگدانەوە بە لستی(١٢٩)ی یەکێتیی نیشتمانیی کوردستان .
هەڤاڵانی یەکێتی: بۆ ئەم داخوازییانەی سەرەوە و مسۆگەر کردنی متمانەی خەڵک بۆئەوەی رۆحی شەهیدان شادبکەین و رێبازەکەی مام جەلال سەربخەین، با هەموومان لەگەڵ کەسوکار و دۆست و ناسیاو بچینە سەر سندوقەکانی دەنگدان و دەس بخەینە سەر دڵمان و دەنگ بە یەکێتییەکەمان بدەین و بەیەک دەنگ هاواربکەین: هەموومان لە پێناوی سەرکەوتنی یەکێتی لە هەڵبژاردنی خولی شەشەمدا بۆئەوەی یەکێتی بەهێزتربێت و خزمەتی زیاتری کورد و کوردستان بکات.
پێویستە لەسەرمان هێزی کاریگەر و هەرە لەپێشی ئەو گۆڕانکارییە بین، دەنگی کەسوکار و بنکەی فراوانی یەکێتی رێکبخەینەوە، ماڵ بە ماڵ لە دەرگایان بدەین، پشتیوان بە بەرنامە و پرۆژەی یەکێتی، داوایان لێبکەین بێنە سەر سندوقەکانی دەنگدان و بەشداریی ئەو ئەرکە بن و رۆڵیان هەبێت لە هەڵبژاردنی پەرلەمانێکدا کە رەنگدانەوەی ویستی ئەوان بێت.
