ئەندامێکی ئەنجومەنی نوێنەرانی عێراق رایگەیاند، دەرکردنی بەشێک لە یاساکان لە ئەنجومەنی نوێنەران پێویستی بە رێکەوتنی سیاسییە نەبوونی ئەو رێکەوتنەش چارەنووسی ئەو یاسایانەی بە نادیاری هێشتووەتەوە.
عەدنان جەحیشی، ئەندامی ئەنجومەنی نوێنەرانی عێراق رایگەیاند، ناکۆکییە سیاسییەکان ژمارەیەکی زۆر لە یاساکانی لە ئەنجومەنی نوێنەران پەکخستووە کە دیارترینیان یاسای لێبوردنی گشتی و یاسای نەوت و غازە.
ئاماژەی بەوەشکرد، رەشنووسی یاسای لێبوردنی گشتیی لە حکومەتەوە رەوانەی پەرلەمان کراوە و لە ئێستادا لەبەردەم لیژنەی یاساییدایە.
ئاشکراشیکرد، لەدوای هەڵبژاردنی سەرۆکی ئەنجومەنی نوێنەران، ئەو رێکەوتنە سیاسییە چالاکدەکەینەوە کە حکومەتی لەسەر پێکهات و جەخت لە تێپەڕاندنی یاسای لێبوردنی گشتی دەکەینەوە لە ئەنجومەنی نوێنەران.
