پارێزگاری هەولێر رایگەیاند، لە رووداوی ئاگرکەوتنەوەکەی شەوی رابردووی بازاڕی قەیسەری 132 کەس برینداربوون و لەو ژمارەیەش 15 یان گواسترانەوە بۆ نەخۆشخانە و چارەسەریان بۆ کراوە.
ئومێد خۆشناو پارێزگاری هەولێر لە راگەیەندراوێکدا دوایین ئامارەکانی ئاگرکەوتنەوەکەی شەوی رابردووی بازاڕی قەیسەری بڵاوکردەوە و ئاشکرایکرد، لە کۆی زیاتر لە چوار هەزار دووکان، 227 دووکان و حەوت کۆگای بچووکى بازاڕەکە سووتان و زیانیان پێگەیشتووە، ئەمڕۆش دوای خەمڵاندنی زەر و زیانەکان دەست بە پاککردنەوەى تەواوی بازاڕەکە کراوە.
ئاشکراشیکرد، بەهۆى قەرەباڵغییەکى زۆرى هاوڵاتییان لە شوێنى رووداوەکە، 132 کەس لە ئەفەسەر و کارمەندانی بەرگریی شارستانی، ئاسایش، پۆلیس، کاسبکار و هاوڵاتی، بریندار بوون و بەشێکیشیان بەهۆی دوکەڵی ئاگرەکەوە تەندروستیان تێکچوو و هەر زوو لە لایەن تیمەکانی تەندروستی لە شوێنی رووداوەکە 117 كەسيان چارەسەرکران و 15 كەسى دیکەشیان کە پێویستبوون گواسترانەوە بۆ نەخۆشخانەى فریاکەوتن و چارەسەری پێویستیان بۆ وەرگیرا.
جەختیشیکردەوە، لیژنەیەک بۆ لێکۆڵینەوە و بەدواداچوون لە هۆکاری کەوتنەوەی ئاگرەکە و خەمڵاندنى قەبارەی زیانە ماددییەکان پێکهێنراوە و لەم نزیکانە دەرەنجامەکانى ئاشکرا دەکرێت.
