بڕیارە ئەمڕۆ ئەنجومەنی وەزیران كۆبوونەوەی ئاسایی هەفتانە ئەنجامبدات، پرسەكانی وەرگرتنی دەرچووان لە زانکۆ و پەیمانگاكان و قەرەبووكردنەوەی زیانلێكەوتووانی لافاوەكەی چەند ڕۆژی ڕابردوو و لێکۆڵینەوە لە هۆکارەکانی ڕوودانی زیانەكان تاوتوێ دەكات.
فەرمانگەی میدیا و زانیاری بڵاویكردەوە، “ئەمڕۆ چوارشەممە ئەنجومەنی وەزیرانی هەرێمی کوردستان کۆبوونەوەی هەفتانەی خۆی ئەنجام دەدات”.
لە کۆبوونەوەکەدا ئەم بابەتانەی خوارەوە گفتوگۆیان لەبارەوە دەكرێت:
یەکەم: خستنەڕووی ڕەشنووسی (پەیڕەوی ئەنجومەنی باڵای گەشەپێدانی خانمان لە هەرێمی کوردستان – عێراق) بە میوانداریی ئەمینداری گشتیی ئەنجومەنی باڵای خانمان.
دووەم: خستنەڕووی بابەتی وەرگرتنی دەرچووانی ئامادەییەکان لە زانکۆ و پەیمانگاکانی هەرێمی کوردستان بۆ ساڵی خوێندنی 2021 – 2022 و چارەسەری زیادبوونی ژمارەی دەرچووان کە تێکڕای نمرەی بەرزیان بەدەستهێناوە لە تاقیکردنەوەی وزاریی ئامادەییەکان و توانای سنوورداری زانکۆ و پەیمانگاکان بۆ وەرگرتنی دەرچووان بەپێی داخوازیی خۆیان.
سێیەم: خستنەڕووی بابەتی قەرەبووکردنەوەی زیانی هاوڵاتییان لە ئەنجامی لافاوی ڕۆژی 2021/10/30 و ڕاسپاردنی وەزارەت و لایەنە پەیوەندیدارەکان بۆ لێکۆڵینەوە لە هۆکارەکانی ڕوودانی ئەو زەرەر و زیانانە و چۆنیەتیی چارەسەرکردنیان.
