وتەبێژی وەزارەتی دارایی هەرێم رایدەگەیەنێت، ئەو داهاتانەی فیدراڵین ئامادەین رادەستی بكەین و دەبێت حكومەتی عێراقیش پابەندبێت بە ناردنی مووچە و شایستە داراییەكانی هەرێمی كوردستان.
هونەر جەمال وتەبێژی وەزارەتی دارایی هەرێم لە لێدوانێكیدا رایگەیاند، بڕیاری دادگای فیدراڵی هەیە كە پێویستە هاوشێوەی ناوچەكانی دیكەی عێراق مووچەی مووچەخۆرانی هەرێم بنێردرێت و ئەو داواكارییانەی حكومەتی عێراق ئاراستەی هەرێمی كوردستانی كردووە جێبەجێكراوە، بەڵام پرسی مووچە بە سیاسی كراوە.
لەبارەی رادەستكردنی داهاتی ناوخۆی هەرێمی كوردستانەوە، وتەبێژەكەی وەزارەتی دارایی هەرێم وتیشی، ” ئەو داهاتە ناوخۆییانەی فیدراڵین ئامادەین رادەستی بكەین و دەبێت حكومەتی عێراقیش پابەندبێت بە ناردنی مووچە و شایستە داراییەكانی هەرێمی كوردستانەوە”.
