ئەو کەشتییە بۆن ناخۆشەی 19 هەزار سەر گوێرەکەی هەڵگرتبوو گەیشتە کەناراوەکانی عێراق و لە بەندەری ئوم قەسر چاوەڕوانی وەرگرتنی رەزامەندیی داخڵبوونە.
کەشتیی بارهەڵگری نەتنەی کوەیتی، کە چەند هەفتەیەک لەمەوبەر گەیشتە کەناراوەکانی شاری کیپ تاونی باشووری ئەفریقا و بۆنێکی ناخۆشی بڵاوکردەوە تا گەیشتە ئەوەی دەزگاکانی شارەکە کەوتنە حاڵەتی ئامادەباشییەوە.
هۆکاری بۆنە ناخۆشەکەی کەشتییەکە هەڵگرتنی 19 هەزار گوێرەکە بوو کە ماوەیەکی زۆر بوو لە بەرازیلەوە بەرەو عێراق بەڕێکرابوون بەڵام بە درێژایی گەشتەکەیان شوێنەکەیان پاکنەکرابووەوە.
بەپێی ئەو زانیارییانەی پێشتر وەزارەتی کشتوکاڵی عێراق بڵاویکردبوونەوە، ئاژەڵەکان پشکنینی پێویستیان بۆ کراوە و تەندروستییان باشە و هیچ نەخۆشییەکیان هەڵنەگرتووە.
چاوەڕێدەکرێت لەگەڵ گەیشتنی ئەو ژمارە ئاژەڵە نرخی گۆشتی سوور لە عێراق دابەزین بەخۆیەوە ببینێت کە ماوەیەکە بە شێوەیەکی بەرچاو بەرزبووەتەوە.
